ఏపీలో సహకార సంఘాల ఎన్నికలకు ప్రభుత్వం కసరత్తు.. 2027 జనవరిలో నిర్వహించే అవకాశం!

ఆంధ్రప్రదేశ్‌లో సహకార సంఘాల ఎన్నికల నిర్వహణకు రాష్ట్ర ప్రభుత్వం కసరత్తు ప్రారంభించినట్లు తెలుస్తోంది. రాష్ట్రవ్యాప్తంగా ఉన్న ప్రాథమిక వ్యవసాయ సహకార పరపతి సంఘాలకు (PACS) ఒకే విడతలో ఎన్నికలు నిర్వహించే దిశగా ప్రభుత్వం అడుగులు వేస్తోంది. ఈ మేరకు జిల్లా స్థాయి సహకార శాఖ అధికారులకు కీలక ఆదేశాలు జారీ చేసినట్లు సమాచారం. రాష్ట్రవ్యాప్తంగా సుమారు 2,050 ప్రాథమిక వ్యవసాయ సహకార పరపతి సంఘాలు ఉన్నాయి. వీటన్నింటికీ ఒకేసారి ఎన్నికలు నిర్వహించేలా అవసరమైన ఏర్పాట్లు చేపట్టాలని జిల్లాల సహకార అధికారులను కూటమి ప్రభుత్వం ఆదేశించినట్లు తెలుస్తోంది. ఎన్నికల నిర్వహణకు సంబంధించి ఇప్పటివరకు చేపట్టిన చర్యలు, అవసరమైన ఏర్పాట్లపై సమగ్ర నివేదికను పది రోజుల్లోగా సమర్పించాలని స్పష్టం చేసినట్లు సమాచారం. ప్రస్తుత పరిస్థితులను పరిశీలిస్తే.. 2027 జనవరిలో ఉమ్మడి జిల్లాల ప్రాతిపదికన సహకార సంఘాల ఎన్నికలు నిర్వహించే అవకాశాలు కనిపిస్తున్నాయి. అయితే ఎన్నికల తేదీలు, పూర్తి షెడ్యూల్‌పై ప్రభుత్వం అధికారిక ప్రకటన వెలువరించాల్సి ఉంది. సహకార సంఘాలు గ్రామీణ ప్రాంతాల్లో వ్యవసాయ రుణాల పంపిణీ, రైతులకు ఆర్థిక సేవలు అందించడంలో కీలక పాత్ర పోషిస్తాయి. ఈ నేపథ్యంలో ఎన్నికల నిర్వహణకు ప్రభుత్వం సిద్ధమవుతుండటం రాజకీయంగానూ ప్రాధాన్యత సంతరించుకుంది. ముఖ్యంగా గ్రామీణ ప్రాంతాల్లో సహకార సంఘాలపై పట్టు సాధించడం రాజకీయ పార్టీలకు కీలకంగా మారనుంది. ఎన్నికల ప్రక్రియ ప్రారంభమైతే గ్రామస్థాయి రాజకీయాల్లో మరోసారి సందడి నెలకొనే అవకాశం ఉంది.