మున్సిపల్ ఫలితాలే పరిషత్ ఎన్నికల్లోనూ పునరావృతం.. మంత్రి బాల వీరాంజనేయ స్వామి ధీమా

ఏపీలో మున్సిపల్ ఎన్నికల్లో కూటమి సాధించిన విజయమే ఎంపీటీసీ, జడ్పీటీసీ ఎన్నికల్లోనూ పునరావృతమవుతుందని మంత్రి బాల వీరాంజనేయ స్వామి ధీమా వ్యక్తం చేశారు. రాష్ట్రవ్యాప్తంగా ప్రజలు కూటమి పార్టీలకు మద్దతుగా నిలుస్తున్నారని ఆయన పేర్కొన్నారు. ప్రకాశం జిల్లా టంగుటూరు మండలం తూర్పు నాయుడుపాలెంలోని పోలింగ్ కేంద్రంలో మంత్రి తన ఓటు హక్కును వినియోగించుకున్నారు. అనంతరం మీడియాతో మాట్లాడిన ఆయన.. మున్సిపల్ ఎన్నికల ఫలితాలు పరిషత్ ఎన్నికల్లోనూ ప్రతిబింబిస్తాయని అభిప్రాయపడ్డారు. ప్రజలు ఏకపక్షంగా కూటమి అభ్యర్థులకు ఓట్లు వేస్తున్నారని చెప్పారు. వైసీపీ నాయకత్వంపై విమర్శలు చేసిన మంత్రి.. పార్టీ అధ్యక్షుడు బలవంతంగా నాయకులను ఎన్నికల బరిలోకి దించారని ఆరోపించారు. ఎన్నికల్లో పోటీ చేసి ఆర్థికంగా నష్టపోయామని వైసీపీ అభ్యర్థులే చెబుతున్నారని వ్యాఖ్యానించారు. ప్రజల తీర్పును గమనించి వైసీపీ నాయకులు తమ వైఖరిని మార్చుకోవాలని హితవు పలికారు. ఇదిలా ఉండగా, ఏపీ వ్యాప్తంగా 28 జిల్లా పరిషత్‌ల పరిధిలో 582 జడ్పీటీసీ స్థానాలకు, 659 మండల పరిషత్‌ల పరిధిలో 7,767 ఎంపీటీసీ స్థానాలకు ఎన్నికలు జరుగుతున్నాయి. జడ్పీటీసీ స్థానాల్లో 2,169 మంది, ఎంపీటీసీ స్థానాల్లో 18,843 మంది అభ్యర్థులు తమ అదృష్టాన్ని పరీక్షించుకుంటున్నారు. ఉదయం నుంచే పోలింగ్ కేంద్రాలకు చేరుకుంటున్న ఓటర్లు తమ ఓటు హక్కును వినియోగించుకుంటున్నారు.