ప్రోత్సాహం కరువు.. మూతపడిన పరిశ్రమలు.. తగ్గుతున్న గోగునార సాగు!

వర్షాధార భూముల్లో తక్కువ పెట్టుబడితో రైతులకు ఆదాయాన్ని అందించే గోగునార పంటకు ప్రస్తుతం ఆదరణ కరువవుతోంది. ఒకప్పుడు విజయనగరం జిల్లాలోని బొబ్బిలి, రాజాం ప్రాంతాల్లో విస్తృతంగా సాగైన ఈ పంట.. గోగునార పరిశ్రమలు మూతపడటంతో క్రమంగా కనుమరుగయ్యే పరిస్థితి ఏర్పడింది. సరైన ప్రోత్సాహం, మార్కెటింగ్ సదుపాయాలు లేకపోవడంతో రైతులు ప్రత్యామ్నాయ పంటల వైపు మొగ్గుచూపుతున్నారు. అయితే ఈ ఏడాది ఖరీఫ్‌ ప్రారంభంలో ఎల్‌నినో ప్రభావంతో ఆశించిన స్థాయిలో వర్షాలు కురవకపోవడంతో కొందరు రైతులు గోగు సాగును ప్రత్యామ్నాయంగా ఎంచుకున్నారు. బొబ్బిలి మండలంలోని చింతాడ, పక్కి, కలవరాయి, కమ్మవలస, ముత్తావలస, శివడవలస తదితర గ్రామాల్లో సుమారు 200 ఎకరాల్లో గోగు సాగు చేపట్టారు. ప్రస్తుతం పంట దిగుబడి ఆశాజనకంగా ఉండటంతో రైతులు సంతోషం వ్యక్తం చేస్తున్నారు. మహిళా కూలీలకు ఉపాధి కల్పిస్తున్న గోగు పంట గోగు పంట కేవలం రైతులకే కాకుండా గ్రామీణ మహిళలకు కూడా ఉపాధి కల్పిస్తోంది. పంట కోత పూర్తయిన తర్వాత గోగు కట్టలను చెరువులు, కాలువల్లో నీటిలో నానబెడతారు. అనంతరం మహిళా కూలీలు వాటి నుంచి నారను వేరు చేస్తారు. ఒక్కో కట్టకు రూ.10 చొప్పున కూలి లభిస్తుండగా.. ఒక మహిళ రోజుకు సుమారు 30 కట్టలను వలిచి రూ.300 వరకు సంపాదిస్తోంది. దీంతో గ్రామీణ ప్రాంతాల్లో మహిళలకు అదనపు ఆదాయం లభిస్తోంది. తక్కువ పెట్టుబడి.. మెట్ట భూముల్లోనూ సాగు గోగు పంటను తక్కువ పెట్టుబడితో వర్షాధారంగా సాగు చేసుకోవచ్చని వ్యవసాయశాఖాధికారి మజ్జి శ్యామ్‌సుందర్‌ తెలిపారు. మెట్ట భూముల్లోనూ ఈ పంటను పండించే అవకాశం ఉందని, తద్వారా రైతులకు అదనపు ఆదాయం సమకూరుతుందని వివరించారు. నాణ్యమైన విత్తనాలను ఎంపిక చేసుకుని, వ్యవసాయశాఖ సూచనలు పాటిస్తే మంచి దిగుబడులు సాధించవచ్చని సూచించారు. పరిశ్రమలకు ప్రోత్సాహం.. రైతులకు భరోసా అవసరం గోగు సాగుకు అనుకూలమైన వాతావరణం, తక్కువ పెట్టుబడి, గ్రామీణ మహిళలకు ఉపాధి కల్పించే అవకాశాలు ఉన్నప్పటికీ పరిశ్రమలు మూతపడటం ఈ పంట భవిష్యత్తుపై ప్రభావం చూపుతోంది. గోగునారకు మార్కెట్‌ సదుపాయాలు కల్పించి, మూతపడిన పరిశ్రమల పునరుద్ధరణకు చర్యలు తీసుకుంటే రైతులకు మళ్లీ ఈ పంటపై ఆసక్తి పెరిగే అవకాశం ఉంది.