తమిళనాడు మత్స్యకారుల బోటు ప్రమాదంపై సీఎం చంద్రబాబు తీవ్ర దిగ్భ్రాంతి.. గాలింపు చర్యలు ముమ్మరం చేయాలని ఆదేశం

అమరావతి, నవంబర్ 6: ప్రకాశం జిల్లా కొత్తపట్నం సమీపంలో చోటుచేసుకున్న తమిళనాడు మత్స్యకారుల బోటు ప్రమాదంపై ముఖ్యమంత్రి చంద్రబాబు నాయుడు తీవ్ర విచారం వ్యక్తం చేశారు. ఈ దుర్ఘటనలో ప్రాణాలు కోల్పోయిన మత్స్యకారుల కుటుంబాలకు ప్రగాఢ సానుభూతి తెలిపారు. గల్లంతైన మరో ఇద్దరి ఆచూకీ కోసం గాలింపు చర్యలను మరింత వేగవంతం చేయాలని అధికారులను ఆదేశించారు. ఈ నెల 3న తమిళనాడుకు చెందిన మత్స్యకారులు ప్రయాణిస్తున్న బోటు సముద్రంలో బోల్తా పడి కొత్తపట్నం తీరానికి కొట్టుకొచ్చింది. ప్రమాద సమయంలో బోటులో మొత్తం తొమ్మిది మంది ఉండగా.. ఏడుగురు మృత్యువాత పడ్డారు. మరో ఇద్దరు గల్లంతయ్యారు. 'మురసు' తుఫాన్ ప్రభావంతో సముద్రంలో ప్రతికూల వాతావరణ పరిస్థితులు ఏర్పడటమే ప్రమాదానికి కారణమని అధికారులు ప్రాథమికంగా వెల్లడించారు. ప్రమాద తీవ్రతను దృష్టిలో ఉంచుకుని గల్లంతైన వారి కోసం గాలింపు చర్యలను ముమ్మరం చేయాలని సీఎం చంద్రబాబు ఆదేశించారు. కోస్ట్‌గార్డ్‌, మెరైన్ పోలీసులు, స్థానిక మత్స్యకారులు పరస్పర సమన్వయంతో పనిచేయాలని సూచించారు. మృతులకు సంబంధించిన పోస్టుమార్టం తదితర ప్రక్రియలను త్వరితగతిన పూర్తి చేయాలని అధికారులకు స్పష్టం చేశారు. తమిళనాడు ప్రభుత్వ అధికారులతో సమన్వయం చేసుకుని మృతదేహాలను వారి స్వస్థలాలకు తరలించే ఏర్పాట్లు చేయాలని ఆదేశించారు. బాధిత కుటుంబాలకు హోంమంత్రి అనిత పరామర్శ సందేశం మరోవైపు, ఈ ప్రమాదంపై రాష్ట్ర హోంమంత్రి వంగలపూడి అనిత కూడా తీవ్ర విచారం వ్యక్తం చేశారు. మత్స్యకారుల మృతిపై వారి కుటుంబాలకు ప్రగాఢ సానుభూతి తెలిపారు. తుఫాన్ కారణంగా ఏర్పడిన ప్రతికూల వాతావరణమే ప్రమాదానికి కారణమని పేర్కొన్నారు. గల్లంతైన ఇద్దరి కోసం గాలింపు చర్యలను వేగవంతం చేయాలని, కోస్ట్‌గార్డ్‌, మెరైన్ పోలీసులు సమన్వయంతో పనిచేయాలని అధికారులకు సూచించారు.