విద్యారంగ అభివృద్ధికి మౌలానా ఆజాద్ సేవలు చిరస్మరణీయం: సీఎం చంద్రబాబు

అమరావతి, నవంబరు 11: భారతదేశ విద్యారంగ అభివృద్ధికి విశేష కృషి చేసిన తొలి కేంద్ర విద్యాశాఖ మంత్రి మౌలానా అబుల్ కలాం ఆజాద్ సేవలను ముఖ్యమంత్రి చంద్రబాబు నాయుడు స్మరించుకున్నారు. ఆయన జయంతి సందర్భంగా ఘనంగా నివాళులర్పించారు. దేశ విద్యావ్యవస్థకు ఆజాద్ అందించిన సేవలు ఎప్పటికీ గుర్తుండిపోతాయని పేర్కొన్నారు. ఈ మేరకు సీఎం చంద్రబాబు ఎక్స్ వేదికగా స్పందించారు. స్వాతంత్య్ర సమరయోధుడిగా, గొప్ప పండితుడిగా, దేశ తొలి విద్యాశాఖ మంత్రిగా మౌలానా అబుల్ కలాం ఆజాద్ భారతదేశానికి విశేష సేవలు అందించారని కొనియాడారు. విద్యారంగ అభివృద్ధి కోసం ఆయన అవిశ్రాంతంగా కృషి చేశారని తెలిపారు. ఆజాద్ జీవితం, ఆయన అనుసరించిన ఆదర్శాలు భవిష్యత్ తరాలకు నిరంతరం స్ఫూర్తినిస్తాయని చంద్రబాబు పేర్కొన్నారు. దేశ నిర్మాణంలో విద్య ప్రాధాన్యతను చాటిచెప్పిన మహనీయుడిగా ఆయన సేవలను గుర్తుచేసుకుంటూ జయంతి సందర్భంగా నివాళులర్పించారు.