విశాఖ ఎకనామిక్ రీజియన్‌పై సీఎం చంద్రబాబు స్పెషల్ ఫోకస్.. రూ.9.50 లక్షల కోట్ల పెట్టుబడుల లక్ష్యం

విశాఖ ఎకనామిక్ రీజియన్‌పై సీఎం చంద్రబాబు ప్రత్యేక దృష్టి.. రూ.9.50 లక్షల కోట్ల పెట్టుబడులే లక్ష్యం ఆంధ్రప్రదేశ్ ఆర్థికాభివృద్ధిలో విశాఖపట్నాన్ని కీలక వృద్ధి కేంద్రంగా తీర్చిదిద్దాలన్న లక్ష్యంతో రాష్ట్ర ప్రభుత్వం వేగంగా అడుగులు వేస్తోంది. ఈ దిశగా విశాఖపట్నం ఎకనామిక్ రీజియన్ (VER) ప్రాజెక్టును రాష్ట్ర అభివృద్ధికి ప్రధాన ఇంజిన్‌గా మార్చే కార్యాచరణపై ముఖ్యమంత్రి నారా చంద్రబాబు నాయుడు బుధవారం రాష్ట్ర సచివాలయంలో ఉన్నతస్థాయి సమీక్ష నిర్వహించారు. ఈ సమావేశంలో పెట్టుబడుల సమీకరణ, మౌలిక సదుపాయాల విస్తరణ, పారిశ్రామికాభివృద్ధి, భవిష్యత్ సాంకేతిక రంగాలపై అధికారులు అనుసరించాల్సిన వ్యూహాన్ని స్పష్టంగా వివరించారు. ప్రభుత్వ అంచనాల ప్రకారం, విశాఖ ఎకనామిక్ రీజియన్ ద్వారా వివిధ రంగాల్లో కలిపి సుమారు రూ.9.50 లక్షల కోట్ల పెట్టుబడులను ఆకర్షించాలని లక్ష్యంగా పెట్టుకుంది. ఇందులో రూ.3.50 నుంచి రూ.4 లక్షల కోట్ల వరకు ప్రభుత్వ పెట్టుబడులు, మిగిలిన రూ.5.30 లక్షల కోట్లను ప్రైవేట్ రంగం నుంచి సమీకరించేలా కార్యాచరణ రూపొందిస్తున్నట్లు సీఎం తెలిపారు. బేసిటీతో అభివృద్ధికి కొత్త దిశ విశాఖ అభివృద్ధికి ప్రతిష్ఠాత్మక బేసిటీ (Bay City) ప్రాజెక్టును యాంకర్ ప్రాజెక్టుగా తీసుకుని, దాని చుట్టూ సమగ్ర ఆర్థికాభివృద్ధి నమూనాను అమలు చేయాలని ప్రభుత్వం భావిస్తోంది. సూక్ష్మస్థాయి ప్రణాళికతో రీజియన్‌లోని ప్రతి ప్రాంతాన్ని, ప్రతి రంగాన్ని అనుసంధానిస్తూ అభివృద్ధి చేపట్టాలని సీఎం అధికారులను ఆదేశించారు. భవిష్యత్ పరిశ్రమలపై ప్రత్యేక దృష్టి సాంప్రదాయ పరిశ్రమలతో పాటు భవిష్యత్ ఆర్థిక వ్యవస్థకు కీలకమైన రంగాలపై కూడా ప్రభుత్వం దృష్టి కేంద్రీకరించింది. ముఖ్యంగా ఏఐ డేటా సెంటర్లు, పోర్టు ఆధారిత పరిశ్రమలు, హైడ్రోజన్ ఇంధనం, క్లీన్ టెక్నాలజీ ఎనర్జీ, పర్యాటక రంగం వంటి విభాగాలను విశాఖ ఎకనామిక్ రీజియన్ అభివృద్ధిలో ప్రధాన స్తంభాలుగా తీర్చిదిద్దాలని సీఎం సూచించారు. అలాగే మూలపేట పోర్టు నుంచి రాజమహేంద్రవరం అఖండ గోదావరి ప్రాజెక్టు వరకు ప్రాంతీయ అభివృద్ధి అనుసంధానంగా ఉండేలా ప్రణాళికలు సిద్ధం చేయాలని ఆదేశించారు. సమన్వయంతోనే వేగవంతమైన అభివృద్ధి విభిన్న ప్రభుత్వ పథకాలు, శాఖలు, నిధులను సమన్వయం చేస్తూ అభివృద్ధి వేగవంతం చేయాలని సీఎం స్పష్టం చేశారు. అవసరమైన చోట వయబిలిటీ గ్యాప్ ఫండింగ్ (VGF) విధానాన్ని అమలు చేసి ప్రైవేట్ పెట్టుబడులను మరింత ప్రోత్సహించాలని సూచించారు. ఈ సమీక్ష సమావేశంలో ప్రధాన కార్యదర్శి సాయిప్రసాద్‌తో పాటు ఆర్థిక, పరిశ్రమలు, పురపాలక, అటవీ, ఇంధన, పర్యాటక శాఖల ఉన్నతాధికారులు పాల్గొన్నారు.