హైదరాబాద్ స్టార్ హాస్పిటల్స్‌లో డేటా లీక్ కలకలం.. కేసు నమోదు, సైబర్ బ్యూరో దర్యాప్తు ప్రారంభం

హైదరాబాద్‌లోని ప్రముఖ స్టార్ హాస్పిటల్స్‌లో రోగులు, ఉద్యోగులకు సంబంధించిన సున్నితమైన సమాచారం లీక్ అయిన ఘటన తీవ్ర ఆందోళనకు దారితీసింది. ఈ ఘటనపై తెలంగాణ సైబర్ సెక్యూరిటీ బ్యూరో కేసు నమోదు చేసి దర్యాప్తు ప్రారంభించింది. ఆస్పత్రి సీఈవో రాహుల్ మెడక్కర్ ఇచ్చిన ఫిర్యాదు ఆధారంగా పోలీసులు పలు కోణాల్లో విచారణ చేపడుతున్నారు. ఫిర్యాదు ప్రకారం, రోగుల వ్యక్తిగత వివరాలు, వైద్య రికార్డులతో పాటు ఆస్పత్రి అంతర్గత గోప్య సమాచారంలో కొంత భాగం కూడా అనధికారికంగా బయటకు వెళ్లినట్లు గుర్తించారు. అంతేకాకుండా, ఈ సమాచారాన్ని "warehouse.diy" అనే వెబ్‌సైట్‌లో అందుబాటులో ఉంచినట్లు ఆస్పత్రి యాజమాన్యం పేర్కొంది. ఆ వెబ్‌సైట్‌లోకి ప్రవేశించేందుకు అవసరమైన లాగిన్ క్రెడెన్షియల్స్ వాట్సాప్ ద్వారా పంచుకున్నట్లు కూడా ఫిర్యాదులో వెల్లడించింది. రోగుల వివరాలతో పాటు ఉద్యోగుల వ్యక్తిగత సమాచారం కూడా లీక్ అయినట్లు ఆరోపణలు రావడంతో వ్యవహారం మరింత తీవ్రత సంతరించుకుంది. ఈ డేటా దుర్వినియోగానికి గురైతే గుర్తింపు చోరీ (Identity Theft), ఆర్థిక మోసాలు, సైబర్ వేధింపులు వంటి నేరాలకు అవకాశం ఉంటుందని నిపుణులు హెచ్చరిస్తున్నారు. ఈ నేపథ్యంలో డేటా లీక్‌కు బాధ్యులైన వ్యక్తులను గుర్తించి చట్టపరమైన చర్యలు తీసుకోవాలని, సంబంధిత వెబ్‌సైట్‌ను వెంటనే బ్లాక్ చేయాలని ఆస్పత్రి యాజమాన్యం పోలీసులను కోరింది. అలాగే దర్యాప్తుకు కీలకంగా ఉపయోగపడే సర్వర్ లాగ్స్, మెటాడేటా వంటి డిజిటల్ ఆధారాలను భద్రపరచాలని కూడా విజ్ఞప్తి చేసింది. ఈ ఘటన కేవలం ఒక ఆస్పత్రికి పరిమితమైన అంశం కాదని, ఆరోగ్య రంగంలో డిజిటల్ భద్రత ఎంత కీలకమో మరోసారి గుర్తుచేసిందని నిపుణులు అభిప్రాయపడుతున్నారు. ఆస్పత్రుల్లో నిల్వ ఉండే వైద్య సమాచారం అత్యంత గోప్యమైనదిగా పరిగణించబడుతుంది. అందువల్ల సైబర్ భద్రతా ప్రమాణాలను మరింత కట్టుదిట్టం చేయాల్సిన అవసరం ఉందనే చర్చ మరోసారి తెరపైకి వచ్చింది. ప్రస్తుతం తెలంగాణ సైబర్ సెక్యూరిటీ బ్యూరో ఈ డేటా లీక్ ఎలా జరిగింది, సమాచారం బయటకు ఎలా చేరింది, ఇందులో అంతర్గత వ్యక్తుల పాత్ర ఏమైనా ఉందా లేదా బయటి నుంచి సైబర్ దాడి జరిగిందా అనే అంశాలపై లోతుగా దర్యాప్తు కొనసాగిస్తోంది.