హైదరాబాద్‌లో నిర్మాణ సంస్థలపై టీజీపీసీబీ కొరడా.. 18 సంస్థలకు నోటీసులు

హైదరాబాద్‌ నగరంలో పెరుగుతున్న వాయు, శబ్ద కాలుష్యానికి కారణమవుతున్న నిర్మాణ ప్రాజెక్టులపై తెలంగాణ కాలుష్య నియంత్రణ మండలి (టీజీపీసీబీ) చర్యలను ముమ్మరం చేసింది. పర్యావరణ నిబంధనలను పట్టించుకోకుండా నిర్మాణ పనులు చేపడుతున్న సంస్థలకు హెచ్చరికలు జారీ చేయడంతో పాటు, నిబంధనల ఉల్లంఘనలకు పాల్పడిన సంస్థలపై కఠిన చర్యలకు ఉపక్రమించింది. ఈ క్రమంలో నిబంధనలు పాటించని 18 నిర్మాణ ప్రాజెక్టులకు నోటీసులు జారీ చేయాలని నిర్ణయించింది. ఇటీవల హైదరాబాద్‌, రంగారెడ్డి జిల్లాల పరిధిలోని పలు నిర్మాణ ప్రాజెక్టుల నుంచి దుమ్ము, ధూళి తీవ్రంగా వ్యాపిస్తోందంటూ స్థానికుల నుంచి ఫిర్యాదులు అందాయి. దీంతో టీజీపీసీబీ రూలింగ్‌ టాస్క్‌ఫోర్స్‌ బృందాలు క్షేత్రస్థాయిలో తనిఖీలు నిర్వహించాయి. ఈ తనిఖీల్లో పలు ప్రాజెక్టులు పర్యావరణ నిబంధనలను ఉల్లంఘిస్తున్నట్లు గుర్తించాయి. ముఖ్యంగా నిర్మాణ ప్రదేశాల చుట్టూ కనీసం 10 మీటర్ల ఎత్తులో ఏర్పాటు చేయాల్సిన విండ్‌ బ్రేకింగ్‌ వాల్స్‌ లేకపోవడంతో నిర్మాణ కార్యకలాపాల సమయంలో వెలువడుతున్న దుమ్ము పరిసర ప్రాంతాలకు వ్యాపిస్తున్నట్లు అధికారులు గుర్తించారు. అంతర్గత రహదారులు, పాదచారుల మార్గాలు, ప్రధాన రహదారులపై దుమ్ము పేరుకుపోవడం కూడా గాలి నాణ్యతపై ప్రభావం చూపుతున్నట్లు నివేదికలో పేర్కొన్నారు. శబ్ద కాలుష్యంపైనా అధికారుల ఆందోళన నిర్మాణ ప్రాజెక్టుల వద్ద శబ్ద కాలుష్యం కూడా పరిమితులను దాటుతున్నట్లు తనిఖీల్లో వెల్లడైంది. వాణిజ్య ప్రాంతాల్లో పగటిపూట అనుమతించిన 65 డెసిబెల్స్‌ పరిమితి కంటే అధికంగా శబ్ద స్థాయులు నమోదయ్యాయి. మరోవైపు నిర్మాణ వ్యర్థాలను నిబంధనల ప్రకారం తొలగించకపోవడం, వాటి నిర్వహణకు సంబంధించిన రికార్డులను కాలుష్య నియంత్రణ మండలికి ఎప్పటికప్పుడు సమర్పించకపోవడం వంటి ఉల్లంఘనలను అధికారులు గుర్తించారు. ఆర్‌ఎంసీ ప్లాంట్‌ మూసివేతకు ఆదేశాలు ఈ అంశాలపై సభ్య కార్యదర్శి గుగులోతు రవి అధ్యక్షతన జరిగిన టాస్క్‌ఫోర్స్‌ కమిటీ సమావేశంలో సమగ్రంగా చర్చించారు. తీవ్రమైన ఉల్లంఘనలకు పాల్పడిన నిర్మాణ ప్రాజెక్టులపై పర్యావరణ పరిహారం విధించాలని నిర్ణయించారు. ఒక నిర్మాణ ప్రాజెక్టుకు అనుబంధంగా పనిచేస్తున్న రెడీమిక్స్‌ కాంక్రీట్‌ (ఆర్‌ఎంసీ) ప్లాంట్‌ను మూసివేయాలని ఇప్పటికే ఉత్తర్వులు జారీ చేశారు. మరో నిర్మాణ ప్రాజెక్టులో పనులు నిలిపివేయాలని ఆదేశాలు జారీ చేసేందుకు నిర్ణయం తీసుకున్నారు. స్వల్ప స్థాయి ఉల్లంఘనలకు పాల్పడిన ప్రాజెక్టుల బ్యాంకు గ్యారెంటీలను జప్తు చేయాలని సిఫారసు చేశారు. కొన్ని ప్రాజెక్టుల్లో గుర్తించిన లోపాలను సరిదిద్దుకునేందుకు 10 రోజుల గడువు విధించారు. ఆస్తుల జప్తు వరకు వెళ్లే అవకాశం కాలుష్య నియంత్రణ నిబంధనలను ఉల్లంఘించే సంస్థలపై ఇకపై కఠినంగా వ్యవహరించాలని అధికారులు స్పష్టం చేశారు. నిర్ణీత గడువులోగా లోపాలను సరిచేసుకోకపోతే బ్యాంకు గ్యారెంటీల జప్తుతో పాటు తదుపరి చట్టపరమైన చర్యలు తీసుకునే అవకాశం ఉంది. అవసరమైతే ఆస్తుల జప్తు వంటి చర్యలకూ వెనుకాడబోమని హెచ్చరించారు. నగరంలో నిర్మాణ రంగం విస్తరిస్తున్న నేపథ్యంలో అభివృద్ధి పనులతో పాటు ప్రజల ఆరోగ్యం, పర్యావరణ పరిరక్షణకు సమాన ప్రాధాన్యం ఇవ్వాల్సిన అవసరం ఉందని ఈ పరిణామాలు స్పష్టం చేస్తున్నాయి.