ఐరాసలో పాకిస్థాన్‌కు భారత్, ఇజ్రాయెల్ షాక్.. ఆయుధ నియంత్రణ తీర్మానానికి వ్యతిరేకంగా ఓటు!

అంతర్జాతీయ వేదికపై పాకిస్థాన్‌కు భారత్ మరోసారి తన వైఖరిని స్పష్టం చేసింది. ప్రాంతీయ, ఉపప్రాంతీయ స్థాయిల్లో సంప్రదాయ ఆయుధ నియంత్రణకు సంబంధించి పాకిస్థాన్, బెలారస్ దేశాలు ఐక్యరాజ్యసమితిలో ప్రవేశపెట్టిన ముసాయిదా తీర్మానానికి భారత్, ఇజ్రాయెల్ వ్యతిరేకంగా ఓటు వేశాయి. ఐక్యరాజ్యసమితి సర్వసభ్య సమావేశం మొదటి కమిటీలో సోమవారం జరిగిన ఓటింగ్‌లో ఈ పరిణామం చోటుచేసుకుంది. మొత్తం 180 దేశాలు తీర్మానానికి అనుకూలంగా ఓటు వేయగా.. భారత్, ఇజ్రాయెల్ మాత్రమే వ్యతిరేకించాయి. ప్రాంతీయ భద్రతకే పరిమితం చేయలేం: భారత్ సంప్రదాయ ఆయుధ నియంత్రణను కేవలం ప్రాంతీయ, ఉపప్రాంతీయ అంశంగా చూడటం సరికాదని భారత్ స్పష్టం చేసింది. దేశాల భద్రతకు సంబంధించిన ఆందోళనలు ప్రాంతీయ సరిహద్దులకే పరిమితం కావని న్యూఢిల్లీ అభిప్రాయపడింది. ఐరాసలో భారత శాశ్వత మిషన్ ప్రథమ కార్యదర్శి అన్మోల్ షేర్ బేడీ మాట్లాడుతూ.. సంప్రదాయ ఆయుధ నియంత్రణ అనేది ప్రపంచవ్యాప్త ప్రాధాన్యం కలిగిన అంశమని పేర్కొన్నారు. దీనిని ప్రధానంగా ప్రాంతీయ, ఉపప్రాంతీయ పరిధిలోనే కొనసాగించాలనే ప్రతిపాదనతో భారత్ ఏకీభవించడం లేదని స్పష్టం చేశారు. గతంలో అనుసరించిన వైఖరికి అనుగుణంగానే ఈసారి కూడా తీర్మానానికి వ్యతిరేకంగా ఓటు వేసినట్లు వెల్లడించారు. ఐరాస కమిషన్ సిఫార్సులను ప్రస్తావించిన భారత్ సంప్రదాయ ఆయుధ నియంత్రణకు సంబంధించి ఇప్పటికే ఐక్యరాజ్యసమితి నిరాయుధీకరణ కమిషన్ పలు మార్గదర్శకాలు, సిఫార్సులను ఏకాభిప్రాయంతో ఆమోదించిందని భారత్ గుర్తుచేసింది. 1993లో ప్రాంతీయ నిరాయుధీకరణపై మార్గదర్శకాలు, 1999లో సంప్రదాయ ఆయుధ నియంత్రణపై సిఫార్సులు, 2017లో సంప్రదాయ ఆయుధాల రంగంలో విశ్వాస నిర్మాణ చర్యలకు సంబంధించిన సూచనలు రూపొందించిన విషయాన్ని ప్రస్తావించింది. ఈ నేపథ్యంలో మరోసారి ప్రత్యేకంగా సూత్రాల రూపకల్పన కోసం కమిషన్‌ను కోరడంపై భారత్ ఆసక్తి వ్యక్తం చేసింది. ఇప్పటికే ఉన్న అంతర్జాతీయ మార్గదర్శకాల ప్రాధాన్యాన్ని పరిగణనలోకి తీసుకోవాల్సిన అవసరాన్ని పరోక్షంగా గుర్తుచేసింది. దక్షిణాసియా ప్రతిపాదనలపైనా అభ్యంతరం ప్రచ్ఛన్న యుద్ధానంతర కాలంలో అంతర్జాతీయ శాంతి, భద్రతకు ఎదురవుతున్న సవాళ్లు ఒక ప్రాంతానికే పరిమితం కావడం లేదని భారత్ అభిప్రాయపడింది. ఒక ప్రాంతం లేదా ఉపప్రాంతంలో సైనిక సమతుల్యతను కొనసాగించాలనే ఆలోచన వాస్తవ పరిస్థితులకు అనుగుణంగా లేదని పేర్కొంది. తీర్మానంలోని దక్షిణాసియా సందర్భంలో సంప్రదాయ ఆయుధ నియంత్రణ ప్రతిపాదనలను ప్రస్తావించిన పేరాపై కూడా భారత్ విడిగా వ్యతిరేక ఓటు వేసింది. ప్రాంతీయ భద్రతకు సంబంధించి వివిధ దేశాల మధ్య ఒప్పందాలను ప్రోత్సహించాలనే ప్రతిపాదనలో సైనికంగా కీలకమైన దేశాలకు ప్రత్యేక బాధ్యత ఉంటుందని తీర్మానం పేర్కొంది. మొత్తంగా చూస్తే.. సంప్రదాయ ఆయుధ నియంత్రణ విషయంలో ప్రాంతీయ పరిధి కంటే విస్తృతమైన అంతర్జాతీయ దృక్పథం అవసరమన్నది భారత్ వాదన. పాకిస్థాన్ మద్దతుతో వచ్చిన తీర్మానంపై భారత్, ఇజ్రాయెల్ ఒకే విధంగా వ్యతిరేక ఓటు వేయడం ఐరాస వేదికపై ప్రాధాన్యం సంతరించుకుంది.