మెదక్‌లో చిరుత కలకలం.. రోడ్డుపై ప్రత్యక్షమైన వన్యమృగం.. వీడియో వైరల్!

మెదక్, నవంబర్ 9: మెదక్ జిల్లాలో చిరుతపులి సంచారం మరోసారి స్థానిక ప్రజలను భయాందోళనకు గురిచేస్తోంది. రామాయంపేట మండలం దంతేపల్లి గ్రామ శివారులో చిరుతపులి కనిపించడంతో పరిసర గ్రామాల ప్రజలు అప్రమత్తమయ్యారు. కాకుల గుట్ట సమీపంలోని కామారెడ్డి–రామాయంపేట ప్రధాన రహదారిపై చిరుత సంచరిస్తున్న దృశ్యాలు స్థానికంగా చర్చనీయాంశంగా మారాయి. వాహనాల రాకపోకలు కొనసాగుతున్న సమయంలో చిరుత రహదారిని దాటుతుండగా ఓ యువకుడు తన సెల్‌ఫోన్‌లో వీడియో చిత్రీకరించాడు. దీంతో ఈ దృశ్యాలు స్థానికంగా వైరల్‌గా మారాయి. రద్దీగా ఉండే రహదారిపై చిరుత కనిపించడంతో వాహనదారులు, ప్రయాణికులు అప్రమత్తమయ్యారు. మరోవైపు చిరుత సంచారంతో సమీప గ్రామాల ప్రజల్లో ఆందోళన నెలకొంది. చిరుత సంచారంపై స్థానికులు అటవీశాఖ అధికారులకు సమాచారం అందించారు. చిరుతను గుర్తించి, ప్రజలకు ఎలాంటి ప్రమాదం జరగకుండా తగిన చర్యలు తీసుకోవాలని కోరుతున్నారు. అటవీశాఖ అధికారులు సైతం ప్రజలు అప్రమత్తంగా ఉండాలని, చిరుత కనిపించిన ప్రాంతాలకు ఒంటరిగా వెళ్లవద్దని సూచిస్తున్నారు. గతంలోనూ చిరుత సంచారం.. మెదక్ జిల్లాలో చిరుత సంచారం ఇదే తొలిసారి కాదు. గత నెలలో తూప్రాన్ మండల పరిధిలోని మల్కాపూర్, గుండ్రెడ్డిపల్లి, కోనాయిపల్లి ప్రాంతాల్లో చిరుత కనిపించినట్లు స్థానికులు తెలిపారు. సుమారు మూడు రోజుల పాటు చిరుత సంచరించిందనే సమాచారంతో గ్రామస్థులు తీవ్ర ఆందోళనకు గురయ్యారు. ముఖ్యంగా రాత్రి వేళల్లో వ్యవసాయ పనుల కోసం పొలాలకు వెళ్లేందుకు కూడా వెనుకడుగు వేశారు. ఇప్పుడు తాజాగా రామాయంపేట మండల పరిధిలో మరోసారి చిరుత కనిపించడంతో జిల్లాలో వన్యప్రాణుల సంచారం అంశం చర్చకు వస్తోంది. చిరుత సంచరిస్తున్న ప్రాంతాలను అటవీశాఖ అధికారులు గుర్తించి పర్యవేక్షణ పెంచాల్సిన అవసరం ఉందని స్థానికులు అభిప్రాయపడుతున్నారు.