ఆన్‌లైన్ పెట్టుబడుల పేరుతో భారీ మోసం.. డబ్బులు విత్‌డ్రా చేసేందుకు అదనపు చెల్లింపుల డిమాండ్‌

ఆన్‌లైన్ పెట్టుబడుల ద్వారా భారీ లాభాలు వస్తాయంటూ నమ్మించి ఓ వ్యక్తిని సైబర్‌ నేరగాళ్లు మోసగించారు. వెబ్‌సైట్‌లో అధిక లాభాలు వచ్చినట్లు చూపిస్తూ బాధితుడిని మరింత పెట్టుబడి పెట్టేలా ప్రోత్సహించారు. అయితే, తన ఖాతాలో ఉన్న రూ.12 లక్షలను ఉపసంహరించుకునేందుకు ప్రయత్నించడంతో అసలు విషయం బయటపడింది. బాధితుడు డబ్బులు విత్‌డ్రా చేసేందుకు ప్రయత్నించగా, సూచించిన విధానాన్ని పాటించలేదనే కారణంతో నిందితులు అతడి ఖాతాను నిలిపివేశారు. ఖాతాను తిరిగి తెరిచి డబ్బులు తీసుకోవాలంటే రూ.5,95,927 రిఫండబుల్ సెక్యూరిటీ డిపాజిట్‌ చెల్లించాలని డిమాండ్ చేశారు. ఆ మొత్తాన్ని చెల్లించిన తర్వాత కూడా వారి వేధింపులు ఆగలేదు. లాభాలతో కలిపి ఉపసంహరణ మొత్తం రూ.15 లక్షలు దాటిందని, టీడీఎస్‌ కింద మరో రూ.5,36,317 చెల్లించాలని నిందితులు ఒత్తిడి చేశారు. అన్ని చెల్లింపులు పూర్తిచేస్తే రూ.23,52,931 అందుతాయని నమ్మించారు. అంతటితో ఆగకుండా, పెద్ద మొత్తాన్ని ఉపసంహరించుకునేందుకు ప్రత్యేక ఖాతా తెరవాలంటూ మరో రూ.5,36,000 డిమాండ్ చేశారు. వరుసగా అదనపు మొత్తాలు చెల్లించాలని ఒత్తిడి చేయడంతో తాను మోసపోయినట్లు బాధితుడు గుర్తించాడు. దీంతో పోలీసులను ఆశ్రయించాడు. అప్రమత్తత అవసరం: ఆన్‌లైన్ పెట్టుబడుల్లో భారీ లాభాలు వస్తాయని చూపిస్తూ, డబ్బులు ఉపసంహరించుకునే సమయంలో సెక్యూరిటీ డిపాజిట్లు, పన్నులు లేదా ఇతర ఛార్జీల పేరుతో అదనపు చెల్లింపులు కోరడం మోసానికి సంకేతం కావచ్చు. పెట్టుబడి పెట్టే ముందు సంబంధిత సంస్థ విశ్వసనీయతను పరిశీలించడం, అనుమానాస్పద లావాదేవీలకు దూరంగా ఉండటం అవసరం.