కేసీఆర్ పాలనలో తెలంగాణ సంపద కొల్లగొట్టారు.. పొంగులేటి తీవ్ర విమర్శలు

బీఆర్ఎస్ పదేళ్ల పాలనపై తెలంగాణ రెవెన్యూ శాఖ మంత్రి పొంగులేటి శ్రీనివాస్‌రెడ్డి తీవ్ర విమర్శలు చేశారు. గత ప్రభుత్వ హయాంలో రాష్ట్ర సంపదను స్వార్థ ప్రయోజనాల కోసం వినియోగించుకున్నారని, ప్రజల సంక్షేమాన్ని విస్మరించారని ఆరోపించారు. తొమ్మిదిన్నరేళ్ల పాటు అధికారంలో ఉన్న బీఆర్ఎస్ ప్రభుత్వం పేదల సమస్యలను పట్టించుకోలేదని విమర్శించారు. ఖమ్మం జిల్లా ఖమ్మం రూరల్ మండలంలోని ఏదులాపురం మున్సిపాలిటీ పరిధిలో ఉన్న తెల్దారుపల్లిలో మంగళవారం పలు అభివృద్ధి పనులకు మంత్రి పొంగులేటి శ్రీనివాస్‌రెడ్డి శంకుస్థాపన చేశారు. ఈ సందర్భంగా నిర్వహించిన మీడియా సమావేశంలో ఆయన గత బీఆర్ఎస్ ప్రభుత్వ పాలనను లక్ష్యంగా చేసుకుని విమర్శలు గుప్పించారు. రైతులకు అండగా నిలిచాం.. నిరుద్యోగులకు ఉద్యోగాలు ప్రతిపక్ష నేతలు తమ ప్రభుత్వంపై చేస్తున్న విమర్శలను పొంగులేటి తప్పుబట్టారు. గతంలో వరి సాగు విషయంలో రైతులను నిరుత్సాహపరిచారని, తమ ప్రభుత్వం మాత్రం రైతులు పండించిన పంటకు బోనస్ అందించి అండగా నిలిచిందని పేర్కొన్నారు. ఇందిరమ్మ ప్రభుత్వం అర్హులైన పేదలకు సంక్షేమ పథకాలను అందిస్తోందని తెలిపారు. నిరుద్యోగులకు ఇచ్చిన హామీ మేరకు ఇప్పటికే 74 వేల ఉద్యోగాలు కల్పించామని మంత్రి వెల్లడించారు. అంతటితో ఆగకుండా రాబోయే రోజుల్లో మరిన్ని ఉద్యోగ అవకాశాలు కల్పిస్తామని హామీ ఇచ్చారు. ప్రతి భూమికి భూదార్.. గ్రామాల్లో సమగ్ర సర్వే రాష్ట్రవ్యాప్తంగా భూముల సమస్యలకు శాశ్వత పరిష్కారం చూపించేందుకు ప్రభుత్వం చర్యలు చేపడుతోందని పొంగులేటి తెలిపారు. సుమారు 120 ఏళ్ల క్రితం భూముల సర్వేలు జరిగాయని, ప్రస్తుత పరిస్థితులకు అనుగుణంగా మరోసారి సమగ్ర భూ సర్వే అవసరమని అభిప్రాయపడ్డారు. రాష్ట్రంలోని ప్రతి అంగుళం భూమిని సర్వే చేసి, భూముల యజమానులకు పూర్తి భరోసా కల్పించడమే ప్రభుత్వ లక్ష్యమని చెప్పారు. పాలేరు నియోజకవర్గంలోని అన్ని గ్రామాల్లో భూ సర్వే చేపట్టాలని జిల్లా కలెక్టర్‌ను ఆదేశించినట్లు వెల్లడించారు. మ్యాప్‌లతో కూడిన భూ వివరాలను సిద్ధం చేసి, ఆధార్ తరహాలో ప్రతి భూయజమానికి ప్రత్యేక భూదార్ గుర్తింపు కల్పిస్తామని స్పష్టం చేశారు. దీంతో భూ యాజమాన్యానికి సంబంధించిన సమస్యలు తగ్గుతాయని ఆశాభావం వ్యక్తం చేశారు. ఇందిరమ్మ ఇళ్లు, విద్యా వైద్యానికి ప్రాధాన్యం రాష్ట్రంలో ఇప్పటికే ఎనిమిది లక్షలకు పైగా ఇందిరమ్మ ఇళ్లను అర్హులైన పేదలకు అందించినట్లు మంత్రి తెలిపారు. విద్య, వైద్య రంగాల అభివృద్ధికి తమ ప్రభుత్వం ప్రత్యేక ప్రాధాన్యం ఇస్తోందని పేర్కొన్నారు. ప్రజలకు సంక్షేమ పథకాలు అందించడంతో పాటు రాష్ట్రంలో అభివృద్ధి పనులను వేగవంతం చేస్తున్నామని పొంగులేటి వివరించారు.