రేషన్ బియ్యానికి పాలిష్.. బ్రాండెడ్ బియ్యం పేరుతో అక్రమ వ్యాపారం!

రేషన్‌ పేదలకు చేరాల్సిన బియ్యం పక్కదారి పడుతోంది. పీడీఎస్‌ బియ్యాన్ని పాలిష్‌ చేసి, వివిధ బ్రాండ్ల పేర్లతో ప్యాకింగ్‌ చేస్తూ బహిరంగ మార్కెట్‌లో విక్రయిస్తున్న అక్రమ వ్యాపారం రంగారెడ్డి జిల్లాలో వెలుగులోకి వచ్చింది. మంచాలలో విజిలెన్స్‌ ఎన్‌ఫోర్స్‌మెంట్‌ అధికారులు నిర్వహించిన తనిఖీల్లో ఏకంగా 150 క్వింటాళ్లకు పైగా రేషన్‌ బియ్యం పట్టుబడటం కలకలం రేపుతోంది. విశ్వసనీయ సమాచారం మేరకు ఎస్పీ రాంకుమార్‌, డీఎస్పీ వెంకట్‌రెడ్డి నేతృత్వంలోని విజిలెన్స్‌ బృందం బుధవారం మంచాలలోని రాఘవేంద్ర రైస్‌మిల్లులో సోదాలు నిర్వహించింది. ఈ తనిఖీల్లో రేషన్‌ బియ్యాన్ని పాలిష్‌ చేసి, వివిధ బ్రాండ్ల పేర్లతో విక్రయిస్తున్నట్లు అధికారులు గుర్తించారు. మిల్లులో ఇప్పటికే పాలిష్‌ చేసి, బస్తాల్లో ప్యాకింగ్‌ చేసిన 50 క్వింటాళ్ల పీడీఎస్‌ బియ్యాన్ని అధికారులు స్వాధీనం చేసుకున్నారు. మిల్లుకు ఎదురుగా ఉన్న గోదాములో అక్రమంగా నిల్వ ఉంచిన మరో 100 క్వింటాళ్లకు పైగా రేషన్‌ బియ్యాన్ని సీజ్‌ చేశారు. మొత్తం 150 క్వింటాళ్లకు పైగా బియ్యం పట్టుబడినట్లు అధికారులు వెల్లడించారు. మరో ఆసక్తికరమైన విషయం ఏమిటంటే.. ఈ బియ్యాన్ని సుమారు 20 రకాల బ్రాండ్ల లేబుళ్లతో బస్తాల్లో నింపి మార్కెట్‌కు తరలిస్తున్నట్లు ప్రాథమిక తనిఖీల్లో గుర్తించారు. రేషన్‌ బియ్యం అసలు గుర్తింపును మార్చి సాధారణ వాణిజ్య బియ్యంగా విక్రయిస్తున్నట్లు అధికారులు తెలిపారు. ఇదే సమయంలో రైస్‌మిల్లు నిర్వహణలోనూ నిబంధనల ఉల్లంఘనలు బయటపడ్డాయి. సరైన లైసెన్స్‌, జీఎస్టీ అనుమతులు లేకుండానే వ్యాపారం నిర్వహిస్తున్నట్లు విజిలెన్స్‌ అధికారులు గుర్తించారు. ఈ వ్యవహారంపై పూర్తిస్థాయి విచారణ జరిపి నిర్వాహకులపై చట్టపరమైన చర్యలు తీసుకుంటామని స్పష్టం చేశారు. పోచారం రైస్‌మిల్లులోనూ నిబంధనల ఉల్లంఘనలు మరోవైపు ఇబ్రహీంపట్నం మండలం పోచారం గ్రామంలోని గణేష్‌ ఆగ్రో ఇండస్ట్రీస్‌ రైస్‌మిల్లులోనూ విజిలెన్స్‌ అధికారులు ఆకస్మిక తనిఖీలు నిర్వహించారు. అక్కడ తూకం యంత్రాలకు అవసరమైన లైసెన్సులు లేకపోవడంతో పాటు 20, 50 కిలోల తూకం మిషన్లు అందుబాటులో లేకపోవడాన్ని గుర్తించారు. అలాగే మిల్లు ఆవరణలోని వేబ్రిడ్జీలో ఉండాల్సిన ధ్రువీకరించిన బాట్లు లేకపోవడంతో లీగల్‌ మెట్రాలజీ అధికారులు కేసు నమోదు చేశారు. పేదలకు అందాల్సిన రేషన్‌ బియ్యాన్ని అక్రమంగా మార్కెట్‌కు తరలిస్తున్న వ్యవహారంపై విజిలెన్స్‌ దృష్టి సారించడం ప్రాధాన్యత సంతరించుకుంది. ఈ అక్రమ వ్యాపారం వెనుక ఇంకా ఎవరైనా ఉన్నారా? రేషన్‌ బియ్యం సరఫరా వ్యవస్థలో ఎక్కడ లోపాలు జరుగుతున్నాయి? అన్న అంశాలపై విచారణలో స్పష్టత రావాల్సి ఉంది.