డమ్మీ తుపాకీ, కత్తులతో బెదిరింపులు.. హైవేపై దోపిడీలకు పాల్పడుతున్న అంతరాష్ట్ర ముఠా అరెస్ట్

సంగారెడ్డి జిల్లాలో జాతీయ రహదారిపై వరుస దారి దోపిడీలకు పాల్పడుతున్న అంతరాష్ట్ర ముఠా గుట్టును పోలీసులు రట్టు చేశారు. వాహనాలను నిలిపి ప్రయాణికులను లక్ష్యంగా చేసుకుంటూ డమ్మీ తుపాకీ, కత్తులతో బెదిరించి నగలు, నగదును దోచుకుంటున్న ముఠాలోని ముగ్గురిని అరెస్ట్ చేశారు. ఈ కేసులో కీలక సూత్రధారి మాత్రం ఇంకా పరారీలో ఉన్నట్లు పోలీసులు వెల్లడించారు. సంగారెడ్డి జిల్లా ఎస్పీ పరితోష్ పంకజ్ తెలిపిన వివరాల ప్రకారం.. అక్టోబరు 17 నుంచి 26వ తేదీ మధ్య ఈ ముఠా జాతీయ రహదారి 65పై నాలుగు ప్రాంతాల్లో దోపిడీలకు పాల్పడింది. ముఖ్యంగా రాత్రి వేళల్లో రహదారిపై ఆగి ఉన్న వాహనాల్లోని ప్రయాణికులను టార్గెట్ చేసుకుని దాడులకు దిగింది. సదాశివపేట, కోహిర్, చిరాగ్‌పల్లి ప్రాంతాల్లో వాహనాలను ఆపి ఉన్నవారిని డమ్మీ తుపాకీ, కత్తులతో బెదిరించి వారి వద్ద ఉన్న నగలు, డబ్బులను అపహరించారు. తెలంగాణ సరిహద్దులు దాటి కర్ణాటకలోని హుమ్నాబాద్ ప్రాంతంలోనూ దారి దోపిడీకి పాల్పడినట్లు పోలీసులు గుర్తించారు. మరోవైపు, నిందితులు పూణేలో చోరీ చేసిన ద్విచక్ర వాహనాన్ని ఉపయోగించి ఈ నేరాలకు పాల్పడినట్లు దర్యాప్తులో వెల్లడైంది. మడ్గి చెక్‌పోస్ట్ వద్ద వాహనాల తనిఖీల సందర్భంగా నిందితులు పోలీసులకు పట్టుబడ్డారు. ముగ్గురిని అదుపులోకి తీసుకున్న పోలీసులు, పరారీలో ఉన్న ప్రధాన సూత్రధారి కోసం గాలింపు చర్యలు చేపట్టారు. హైవేలపై రాత్రివేళల్లో ప్రయాణించే వాహనదారులను లక్ష్యంగా చేసుకుని రాష్ట్రాల సరిహద్దులు దాటి దోపిడీలకు పాల్పడుతున్న ఈ ముఠా అరెస్ట్‌తో పోలీసులు కీలక పురోగతి సాధించారు.