సింగరేణి డిస్మిస్డ్ ఉద్యోగులకు మరో అవకాశం.. తిరిగి విధుల్లోకి తీసుకునేందుకు నిర్ణయం

భూపాలపల్లి: సింగరేణి సంస్థలో విధులకు గైర్హాజరైన కారణంగా ఉద్యోగాలు కోల్పోయిన వారికి మరో అవకాశం లభించింది. 2023 నుంచి 2025 మధ్య గైర్హాజరు కారణంగా విధుల నుంచి తొలగింపునకు గురైన ఉద్యోగులను తిరిగి విధుల్లోకి తీసుకునేందుకు సంస్థ నిర్ణయం తీసుకుంది. ఈ మేరకు పునర్నియామక ప్రక్రియకు దరఖాస్తులు ఆహ్వానిస్తున్నట్లు భూపాలపల్లి సింగరేణి ఏరియా జనరల్ మేనేజర్ ఏనుగు రాజేశ్వర్‌రెడ్డి వెల్లడించారు. ఉపముఖ్యమంత్రి భట్టి విక్రమార్క ఆదేశాల మేరకు ఈ నిర్ణయం తీసుకున్నట్లు సంస్థ తెలిపింది. పునర్నియామక ప్రక్రియను పరిశీలించేందుకు ప్రత్యేకంగా హైపవర్ కమిటీని కూడా ఏర్పాటు చేసింది. ఈ పునర్నియామకానికి కొన్ని అర్హతలను సంస్థ నిర్దేశించింది. 2026 ఏప్రిల్ నాటికి అభ్యర్థుల వయసు 46 ఏళ్లకు మించకూడదు. అలాగే గత ఐదేళ్లలో ఏవైనా రెండేళ్లలో కనీసం 100 మస్టర్లు పూర్తి చేసి ఉండాలి. అదనంగా అభ్యర్థులు వైద్యపరంగా ఉద్యోగానికి అర్హులై ఉండాలి. అర్హతలు కలిగిన మాజీ ఉద్యోగులు ఈ నెల 14వ తేదీలోగా తమ దరఖాస్తులను సమర్పించాలని ఏరియా జనరల్ మేనేజర్ సూచించారు. ఉద్యోగాలు కోల్పోయిన కార్మికులకు తిరిగి ఉపాధి పొందేందుకు ఈ నిర్ణయం మరో అవకాశంగా మారనుంది.