తెలంగాణను కరువు రాష్ట్రంగా ప్రకటించాలి.. రూ.25 వేల కోట్ల సాయం అందించాలి: కూనంనేని

తెలంగాణలో ఎల్‌నినో ప్రభావంతో వ్యవసాయ రంగం తీవ్ర సంక్షోభాన్ని ఎదుర్కొంటోందని కొత్తగూడెం ఎమ్మెల్యే కూనంనేని సాంబశివరావు ఆందోళన వ్యక్తం చేశారు. ఖమ్మం జిల్లాలో సాగునీరు అందక పంటలు ఎండిపోయి, సాగు భూములు బీడు భూములుగా మారుతున్నాయని పేర్కొన్నారు. రైతులు పెట్టుబడులు కోల్పోయి ఆర్థిక ఇబ్బందుల్లో కూరుకుపోతున్న నేపథ్యంలో కేంద్ర, రాష్ట్ర ప్రభుత్వాలు తక్షణమే స్పందించాలని డిమాండ్ చేశారు. తెలంగాణను కరువు రాష్ట్రంగా ప్రకటించి, కరువు ప్రభావిత ప్రాంతాలకు ప్రత్యేక ఆర్థిక ప్యాకేజీ అందించాలని కూనంనేని కోరారు. ఎండిపోయిన పంటలకు, సాగు చేయలేక బీడుగా మారిన భూములకు నష్టపరిహారం చెల్లించాలని సూచించారు. వరి పంటకు ఎకరాకు రూ.30 వేల చొప్పున, పత్తి, మిర్చి తదితర పంటలకు ఎకరాకు రూ.50 వేల చొప్పున పరిహారం అందించాలని ప్రభుత్వాన్ని కోరారు. వ్యవసాయంపై ఆధారపడి జీవిస్తున్న కూలీలను కూడా ఆదుకోవాల్సిన బాధ్యత ప్రభుత్వాలపై ఉందని ఆయన పేర్కొన్నారు. వ్యవసాయ కూలీలకు రూ.10 వేల కరువు భత్యం చెల్లించాలని, రేషన్ బియ్యంతో పాటు 16 రకాల నిత్యావసర సరుకులను పంపిణీ చేయాలని విజ్ఞప్తి చేశారు. కరువు పరిస్థితులపై కేంద్ర, రాష్ట్ర ప్రభుత్వాలు సమన్వయంతో చర్యలు తీసుకోవాల్సింది పోయి, పరస్పరం నిందారోపణలకు దిగుతున్నాయని కూనంనేని విమర్శించారు. రైతులు పంటలు కోల్పోయి ఇబ్బందులు పడుతుంటే రాజకీయ విమర్శలకే పరిమితం కావడం సరికాదన్నారు. కేంద్ర ప్రభుత్వం తెలంగాణకు తక్షణమే రూ.25 వేల కోట్ల కరువు సహాయ నిధిని ప్రకటించి రైతులను ఆదుకోవాలని డిమాండ్ చేశారు. కరువు ప్రభావిత రైతులు, వ్యవసాయ కూలీలకు న్యాయం జరిగేలా ప్రభుత్వాలు వెంటనే కార్యాచరణ చేపట్టాలని ఆయన కోరారు. ఈ పర్యటనలో తెలంగాణ రైతు సంఘం రాష్ట్ర నాయకులు భాగం హేమంతరావు, జిల్లా నాయకులు దొండపాటి రమేష్, ఎర్రబాబు తదితరులు పాల్గొన్నారు.