ఏలూరు బొగ్గు గనుల్లో రిలయన్స్ భారీ ప్రణాళిక.. దేశంలో తొలి భూగర్భ కోల్ గ్యాసిఫికేషన్కు రంగం సిద్ధం

ఏలూరు జిల్లా చింతలపూడి, రేచెర్ల బొగ్గు గనులు దేశ ఇంధన రంగంలో కీలక కేంద్రాలుగా మారే అవకాశాలు కనిపిస్తున్నాయి. కేంద్ర బొగ్గు మంత్రిత్వశాఖ నిర్వహించిన ఈ-వేలంలో ఈ రెండు బొగ్గు బ్లాకులను రిలయన్స్ సంస్థ దక్కించుకోవడంతో, అత్యాధునిక భూగర్భ కోల్ గ్యాసిఫికేషన్ (Underground Coal Gasification - UCG) సాంకేతికతను అమలు చేయడానికి సంస్థ ప్రణాళికలు రూపొందిస్తోంది. ప్రతిపాదిత ప్రాజెక్టులో సుమారు రూ.1 లక్ష కోట్ల పెట్టుబడిని సంస్థ పరిశీలిస్తున్నట్లు సమాచారం. ఇటీవల రిలయన్స్ ప్రతినిధులు ముఖ్యమంత్రి చంద్రబాబుతో సమావేశమై ప్రాజెక్టు రూపురేఖలు, అమలు కార్యాచరణపై చర్చించినట్లు అధికార వర్గాలు తెలిపాయి. ప్రాజెక్టు అమలైతే ఉమ్మడి పశ్చిమగోదావరి జిల్లాలో ప్రత్యక్ష, పరోక్ష ఉపాధి అవకాశాలు గణనీయంగా పెరిగే అవకాశముందని అంచనా వేస్తున్నారు. దేశంలోనే తొలి ప్రయోగం చింతలపూడి, రేచెర్ల ప్రాంతాల్లోని బొగ్గు నిల్వలు భూమి ఉపరితలం నుంచి సుమారు 600 మీటర్లకు పైగా లోతులో ఉన్నాయి. ఈ లోతు నుంచి సాంప్రదాయ పద్ధతుల్లో బొగ్గు తవ్వకం ఆర్థికంగా భారమైన ప్రక్రియ కావడంతో, భూగర్భంలోనే బొగ్గును నియంత్రిత రసాయన ప్రక్రియ ద్వారా వాయువు రూపంలోకి మార్చి పైకి తీసుకువచ్చే కోల్ గ్యాసిఫికేషన్ సాంకేతికతను ఉపయోగించాలని సంస్థ భావిస్తోంది. ఈ విధానం విజయవంతమైతే దేశంలోనే తొలి కమర్షియల్ అండర్గ్రౌండ్ కోల్ గ్యాసిఫికేషన్ ప్రాజెక్టుగా ఇది నిలిచే అవకాశం ఉంది. అపార బొగ్గు నిల్వలు చింతలపూడి బ్లాక్లో సుమారు 1,200 హెక్టార్ల విస్తీర్ణంలో 904.94 మిలియన్ టన్నుల 'జీ-12' గ్రేడ్ బొగ్గు నిల్వలు ఉన్నట్లు అంచనా. రేచెర్ల బ్లాక్లో 2,225 హెక్టార్ల విస్తీర్ణంలో 2,225.67 మిలియన్ టన్నుల 'జీ-13' గ్రేడ్ నిల్వలు గుర్తించారు. ఈ రెండు బ్లాకుల్లో కలిపి సుమారు 3,130.61 మిలియన్ టన్నుల బొగ్గు నిల్వలు ఉన్నట్లు భౌగోళిక అంచనాలు సూచిస్తున్నాయి. కోల్ గ్యాసిఫికేషన్ వల్ల ప్రయోజనం ఏమిటి? సాంప్రదాయ బొగ్గు తవ్వకాలతో పోలిస్తే, భూగర్భ కోల్ గ్యాసిఫికేషన్లో బొగ్గును బయటకు తీయాల్సిన అవసరం తగ్గుతుంది. భూమి లోపలే బొగ్గును సింథటిక్ గ్యాస్ (సిన్గ్యాస్)గా మార్చి పైకి తీసుకువచ్చి, దాని ద్వారా అమ్మోనియా, అమ్మోనియం నైట్రేట్ వంటి పారిశ్రామిక ఉత్పత్తుల తయారీలో వినియోగించవచ్చు. దీంతో దిగుమతులపై ఆధారపడే కొన్ని రసాయన ఉత్పత్తుల స్థానిక తయారీకి ఊతం లభించే అవకాశముంది. అమలు సవాళ్లు కూడా కీలకమే అయితే, ఇలాంటి భారీ ప్రాజెక్టుల విజయవంతమైన అమలుకు పర్యావరణ అనుమతులు, భూగర్భ జలాలపై ప్రభావం, సాంకేతిక సామర్థ్యం, ఆర్థిక సాధ్యత వంటి అంశాలు అత్యంత కీలకంగా మారనున్నాయి. ప్రతిపాదిత పెట్టుబడి వాస్తవ రూపం దాల్చాలంటే కేంద్ర, రాష్ట్ర ప్రభుత్వాల అనుమతులతో పాటు పర్యావరణ ప్రమాణాల అమలు కూడా నిర్ణయాత్మకంగా ఉండనుంది. 2029 లక్ష్యం రిలయన్స్ సంస్థ ప్రతిపాదిత కార్యాచరణ ప్రకారం, అవసరమైన అనుమతులు, మౌలిక సదుపాయాల అభివృద్ధి పూర్తయితే 2029 నాటికి ఈ ప్రాజెక్టును దశలవారీగా అందుబాటులోకి తీసుకురావడమే లక్ష్యంగా ఉన్నట్లు సమాచారం. ఈ ప్రాజెక్టు విజయవంతమైతే ఆంధ్రప్రదేశ్ పారిశ్రామికాభివృద్ధితో పాటు దేశ ఇంధన, రసాయన రంగాల్లో కూడా కొత్త అధ్యాయానికి నాంది పలికే అవకాశముందని నిపుణులు భావిస్తున్నారు.