జాతీయం
12 articles published
ఫరీదాబాద్ కాల్పుల కేసు.. పార్కింగ్ వివాదం నుంచి హత్య వరకు.. వెలుగులోకి సీసీటీవీ దృశ్యాలు
ఫరీదాబాద్‌లో పార్కింగ్ స్థలం విషయంలో తలెత్తిన వివాదం పరమ్‌జీత్ ధన్‌కర్ హత్యకు దారితీసింది. పొరుగింటి వ్యక్తి మోహన్ శర్మ తన లైసెన్స్‌డ్ పిస్టల్‌తో 16 రౌండ్ల వరకు కాల్పులు జరపడంతో ధన్‌కర్ ప్రాణాలు కోల్పోయారు. ఘటనకు సంబంధించిన సీసీటీవీ దృశ్యాలు తాజాగా వెలుగులోకి వచ్చాయి. ధన్‌కర్ కుమారుడి ఫిర్యాదుతో కేసు నమోదు చేసిన పోలీసులు నిందితుడిని అదుపులోకి తీసుకుని దర్యాప్తు చేస్తున్నారు.
సినిమా టైటిల్‌తోనే సగం విజయం.. చివరి నిమిషంలో మార్పులపై ఫిలిం చాంబర్ల అభ్యంతరం!
సెన్సార్‌ బోర్డు కొత్త నిబంధనల్లో చివరి దశలో సినిమా టైటిల్‌ మార్చే అవకాశం కల్పించడంపై తెలుగు, మలయాళ చిత్ర పరిశ్రమల ఫిలిం చాంబర్లు అభ్యంతరం వ్యక్తం చేస్తున్నాయి. ఇప్పటికే టైటిల్‌తో పోస్టర్లు, టీజర్లు, డిజిటల్‌ ప్రచారం, డిస్ట్రిబ్యూషన్‌, ఓటీటీ ఒప్పందాలు జరుగుతున్న నేపథ్యంలో చివరి నిమిషంలో పేరు మార్చడం నిర్మాతలకు భారీ ఆర్థిక నష్టాలను కలిగిస్తుందని ఆందోళన చెందుతున్నాయి. ఈ నిబంధనను పునఃపరిశీలించాలని తెలుగు ఫిలిం చాంబర్‌ సీబీఎఫ్‌సీకి లేఖ రాయడానికి సిద్ధమవుతుండగా, కేరళ ఫిలిం చాంబర్‌ ఇప్పటికే తన అభ్యంతరాలను తెలియజేసింది. దక్షిణాది ఫిలిం చాంబర్లు సంయుక్తంగా సెన్సార్‌ బోర్డుతో చర్చలు జరిపేందుకు కార్యాచరణ రూపొందిస్తున్నాయి.
సోనియా గాంధీ ఆత్మకథలో మూడు తప్పులు.. చారిత్రక తేదీలపై విమర్శలు!
సోనియా గాంధీ ఆత్మకథ ‘బిలాంగింగ్‌: ఏ జర్నీ ఆఫ్‌ లవ్‌’లో మూడు చారిత్రక తేదీలకు సంబంధించిన పొరపాట్లు వెలుగులోకి వచ్చాయి. అన్నా హజారే అవినీతి వ్యతిరేక ఉద్యమం ప్రారంభమైన సంవత్సరం, ఆర్‌ఎస్‌ఎస్ స్థాపన సంవత్సరం, కాంగ్రెస్ నేత అహ్మద్ పటేల్ మరణించిన సంవత్సరం తప్పుగా పేర్కొన్నట్లు గుర్తించారు. దీంతో పుస్తకం విడుదలైన వెంటనే రాజకీయ, చారిత్రక చర్చకు దారితీసింది.
తొమ్మిది పెళ్లిళ్ల ఆరోపణలు.. ఏడో భర్తపై కేసును కొట్టివేసిన హైకోర్టు
తొమ్మిది వివాహాలు చేసుకున్నారంటూ ఆరోపణలు ఎదుర్కొంటున్న మహిళ తన ఏడో భర్తపై వరకట్న వేధింపులు, క్రూరత్వం ఆరోపణలతో కేసు పెట్టారు. అయితే ఆమె చేసిన ఆరోపణలకు ప్రాథమిక ఆధారాలు లేవని పేర్కొన్న కర్ణాటక హైకోర్టు, రాజకీయ నాయకుడిపై నమోదైన కేసును కొట్టివేసింది. మహిళ నాలుగు వివాహాలే చేసుకున్నానని, ప్రతి వివాహం తర్వాత చట్టబద్ధంగా విడిపోయినట్లు కోర్టుకు తెలిపారు.
ఢిల్లీలో మూడంతస్తుల భవనం కుప్పకూలి ప్రమాదం.. శిథిలాల కింద పలువురు?
దేశ రాజధాని ఢిల్లీలో మరో భారీ భవన ప్రమాదం ఆందోళనకు గురిచేసింది. పాత ఢిల్లీలోని చావ్డీ బజార్ మెట్రో స్టేషన్ సమీపంలో గురువారం ఉదయం నిర్మాణంలో ఉన్న మూడు అంతస్తుల భవనం ఒక్కసారిగా కుప్పకూలింది. ఈ ఘటనతో ఆ ప్రాంతంలో తీవ్ర కలకలం రేగింది. భవనం శిథిలాల కింద పలువురు చిక్కుకున్నట్లు అధికారులు అనుమానిస్తున్నారు. నవంబర్ 5 ఉదయం చావ్డీ బజార్ పరిధిలోని గలీ సితారా వద్ద ఈ ప్రమాదం చోటుచేసుకుంది. భవనం ఒక్కసారిగా కూలిపోవడంతో భారీగా శిథిలాలు రోడ్డుపై పడిపోయాయి. దీంతో స్థానికులు భయాందోళనకు గురయ్యారు. వెంటనే పోలీసులకు, అగ్నిమాపక శాఖకు సమాచారం అందించారు. సమాచారం అందుకున్న పోలీసులు, ఫైర్ సిబ్బంది, రెస్క్యూ బృందాలు హుటాహుటిన ఘటనా స్థలానికి చేరుకున్నాయి. శిథిలాల కింద చిక్కుకున్న వారిని గుర్తించి బయటకు తీసుకొచ్చేందుకు సహాయక చర్యలు చేపట్టాయి. ఈ ఆపరేషన్ కోసం నీటి ట్యాంకర్లు, రెస్క్యూ వాహనాలతో పాటు కనీసం ఆరు అగ్నిమాపక బృందాలను రంగంలోకి దించారు. ప్రస్తుతం శిథిలాలను తొలగిస్తూ లోపల ఎవరైనా చిక్కుకున్నారా అనే కోణంలో గాలింపు కొనసాగిస్తున్నారు. సీనియర్ అధికారులు సైతం ఘటనా స్థలంలోనే ఉండి సహాయక చర్యలను పర్యవేక్షిస్తున్నారు. అయితే భవనం కూలిపోవడానికి గల కారణాలు ఇంకా వెల్లడికాలేదు. ప్రమాద సమయంలో భవనంలో ఎంతమంది ఉన్నారు? ఎంతమంది శిథిలాల కింద చిక్కుకున్నారు? ఎవరైనా గాయపడ్డారా? అనే వివరాలపై స్పష్టత రావాల్సి ఉంది. సహాయక చర్యలు పూర్తయిన తర్వాతే ప్రమాద తీవ్రతపై పూర్తి వివరాలు వెల్లడయ్యే అవకాశం ఉంది.
హోర్ముజ్‌లో భారత్ నౌకలకు ప్రత్యేక అనుమతి.. ఇరాన్ కీలక నిర్ణయం
హోర్ముజ్ జలసంధిలో భారత్‌కు చెందిన వాణిజ్య నౌకల రాకపోకలకు ఇరాన్ ప్రత్యేక అనుమతి ఇచ్చింది. భారత్‌తో పాటు చైనా, ఇరాక్, ఖతార్ నౌకలపై ఎలాంటి ఆంక్షలు ఉండవని ప్రకటించింది. అయితే భారత్, చైనా నౌకలు ప్రయాణ రుసుము చెల్లించాల్సి ఉంటుందని, ఖతార్ నౌకలకు ఉచితంగా అనుమతి ఇచ్చినట్లు అంతర్జాతీయ వార్తా కథనాలు పేర్కొన్నాయి.
నీట్ పీజీ ప్రవేశాల్లో కీలక మార్పులు.. 2027 నుంచి ర్యాంకుల ఆధారంగా సీట్ల కేటాయింపు!
నీట్ పీజీ, నీట్ సూపర్ స్పెషాలిటీ ప్రవేశాల్లో 2027 నుంచి పర్సంటైల్ ఆధారిత అర్హతకు బదులుగా ర్యాంకుల ఆధారంగా మెరిట్ ప్రకారం సీట్లు కేటాయించాలని 12 మంది సభ్యుల నిపుణుల కమిటీ సిఫారసు చేసింది. ఎన్‌ఎంసీ ఈ ప్రతిపాదనకు సూత్రప్రాయంగా ఆమోదం తెలిపింది. సీట్లు ఖాళీగా ఉంటున్నాయనే కారణంతో కటాఫ్‌ను భారీగా తగ్గించడం సరికాదని కమిటీ పేర్కొంది. నాన్ క్లినికల్ కోర్సుల ఫీజుల తగ్గింపు, కొన్ని విభాగాలకు సర్వీస్ బాండ్ల నుంచి మినహాయింపు, కౌన్సెలింగ్‌లో జాప్యం నివారణ వంటి కీలక సూచనలు చేసింది. అయితే కొత్త విధానం అమలుకు సంబంధించిన పూర్తి మార్గదర్శకాలు ఇంకా ఖరారు కావాల్సి ఉంది.
దీపావళి, హోలీకి ఉచిత గ్యాస్ సిలిండర్లు.. యోగి సర్కార్ కీలక ప్రకటన
ఉత్తరప్రదేశ్‌లో వచ్చే ఏడాది అసెంబ్లీ ఎన్నికలు జరగనున్న నేపథ్యంలో ముఖ్యమంత్రి యోగి ఆదిత్యనాథ్ కీలక హామీ ఇచ్చారు. ప్రధానమంత్రి ఉజ్వల యోజన కింద అర్హులైన పేద కుటుంబాలకు దీపావళి, హోలీ పండుగల సందర్భంగా ఒక్కో ఉచిత ఎల్పీజీ సిలిండర్ అందించనున్నట్లు ప్రకటించారు. గ్యాస్ రీఫిల్ సబ్సిడీ కోసం రాష్ట్ర ప్రభుత్వం రూ.1,500 కోట్లు కేటాయించినట్లు వెల్లడించారు.
పుణె మెట్రోకు భారీ విస్తరణ.. రూ.21,800 కోట్ల పనులకు మోదీ శ్రీకారం!
మహారాష్ట్రలోని పుణె నగర మెట్రో రవాణా వ్యవస్థ విస్తరణకు ప్రధాని నరేంద్ర మోదీ శ్రీకారం చుట్టారు. మొత్తం రూ.21,800 కోట్ల విలువైన ప్రాజెక్టుల్లో భాగంగా సుమారు 23 కిలోమీటర్ల పుణె మెట్రో మూడో లైన్‌ను ప్రారంభించారు. మరోవైపు రూ.13,500 కోట్ల అంచనా వ్యయంతో నాలుగు కొత్త మెట్రో కారిడార్ల నిర్మాణానికి శంకుస్థాపన చేశారు. ఈ ప్రాజెక్టులు పూర్తయితే పుణె నగరంలోని ఐటీ హబ్‌లు, ప్రధాన నివాస ప్రాంతాలు, వాణిజ్య కేంద్రాలకు మెరుగైన మెట్రో కనెక్టివిటీ అందనుంది. ట్రాఫిక్ రద్దీ, వాహన కాలుష్యాన్ని తగ్గించడంతో పాటు ప్రజా రవాణాను మరింత బలోపేతం చేయడం ఈ విస్తరణ ప్రధాన లక్ష్యం.
నిరసన హక్కుతో పాటు ఇతరుల ఇబ్బందులనూ గుర్తించాలి.. సుప్రీంకోర్టు కీలక వ్యాఖ్యలు
ఢిల్లీలో నిరసన కార్యక్రమాల వల్ల వ్యాపారాలు దెబ్బతింటున్నాయని వ్యాపార సంఘాలు దాఖలు చేసిన పిటిషన్‌పై సుప్రీంకోర్టు కీలక వ్యాఖ్యలు చేసింది. నిరసన తెలిపే హక్కు అందరికీ ఉన్నప్పటికీ, ఇతరుల జీవనోపాధి, వ్యాపార కార్యకలాపాలకు ఇబ్బందులు కలిగించకూడదని పేర్కొంది. నిరసనలను నిర్వహిస్తున్న వారిని కూడా పిటిషన్‌లో ప్రతివాదులుగా చేర్చాలని సూచిస్తూ కేంద్ర ప్రభుత్వానికి, ఇతరులకు నోటీసులు జారీ చేసింది.
G20 Meeting: సైనిక చర్యలతో సమస్యలు పరిష్కారం కావు.. జైశంకర్ కీలక వ్యాఖ్యలు
జీ20 దేశాల విదేశాంగ మంత్రుల సమావేశంలో భారత విదేశాంగ మంత్రి ఎస్. జైశంకర్ అంతర్జాతీయ వివాదాల పరిష్కారానికి సైనిక చర్యల కంటే దౌత్యపరమైన చర్చలకే ప్రాధాన్యం ఇవ్వాలని సూచించారు. సముద్ర మార్గాల్లో నౌకలు, నావికుల భద్రతను కాపాడాలని, ప్రపంచ వాణిజ్యానికి అడ్డంకులు తొలగించాలని పిలుపునిచ్చారు. ఉగ్రవాదాన్ని ఎదుర్కోవడంలో ప్రపంచ దేశాలు సమన్వయంతో పనిచేయాల్సిన అవసరాన్ని నొక్కిచెప్పారు. తదుపరి జీ20 శిఖరాగ్ర సదస్సు డిసెంబర్ 14, 15 తేదీల్లో మియామీలో జరగనుంది.
Uttarakhand Helicopter Crash: ప్రమాదానికి ముందు ప్రయాణికుడి చివరి సెల్ఫీ వీడియో వైరల్‌!
ఉత్తరాఖండ్‌లోని చమోలీ జిల్లాలో జరిగిన హెలికాప్టర్‌ ప్రమాదంలో ఐదుగురు ప్రయాణికులు, పైలట్‌ సహా ఆరుగురు ప్రాణాలు కోల్పోయారు. ప్రమాదానికి ముందు ప్రయాణికుడు ప్రతాప్‌ బచిహళ్లి నింగరాజు రికార్డు చేసిన సెల్ఫీ వీడియో సోషల్ మీడియాలో వైరల్‌గా మారింది. బద్రీనాథ్‌ నుంచి డెహ్రాడూన్‌ వైపు వెళ్తున్న హెలికాప్టర్‌ జోషిమఠ్‌ లోయ ప్రాంతంలో సంబంధాలు కోల్పోయి, చాయ్‌ గ్రామం సమీపంలో కొండను ఢీకొని కూలిపోయింది. ప్రమాదం నేపథ్యంలో సంబంధిత సంస్థ హెలికాప్టర్‌ సేవలను నిలిపివేశారు. AAIB, DGCA అధికారులు ప్రమాదానికి గల కారణాలపై దర్యాప్తు చేపట్టారు.
