ఢిల్లీలో మూడంతస్తుల భవనం కుప్పకూలి ప్రమాదం.. శిథిలాల కింద పలువురు?

దేశ రాజధాని ఢిల్లీలో మరో భారీ భవన ప్రమాదం ఆందోళనకు గురిచేసింది. పాత ఢిల్లీలోని చావ్డీ బజార్ మెట్రో స్టేషన్ సమీపంలో గురువారం ఉదయం నిర్మాణంలో ఉన్న మూడు అంతస్తుల భవనం ఒక్కసారిగా కుప్పకూలింది. ఈ ఘటనతో ఆ ప్రాంతంలో తీవ్ర కలకలం రేగింది. భవనం శిథిలాల కింద పలువురు చిక్కుకున్నట్లు అధికారులు అనుమానిస్తున్నారు. నవంబర్ 5 ఉదయం చావ్డీ బజార్ పరిధిలోని గలీ సితారా వద్ద ఈ ప్రమాదం చోటుచేసుకుంది. భవనం ఒక్కసారిగా కూలిపోవడంతో భారీగా శిథిలాలు రోడ్డుపై పడిపోయాయి. దీంతో స్థానికులు భయాందోళనకు గురయ్యారు. వెంటనే పోలీసులకు, అగ్నిమాపక శాఖకు సమాచారం అందించారు. సమాచారం అందుకున్న పోలీసులు, ఫైర్ సిబ్బంది, రెస్క్యూ బృందాలు హుటాహుటిన ఘటనా స్థలానికి చేరుకున్నాయి. శిథిలాల కింద చిక్కుకున్న వారిని గుర్తించి బయటకు తీసుకొచ్చేందుకు సహాయక చర్యలు చేపట్టాయి. ఈ ఆపరేషన్ కోసం నీటి ట్యాంకర్లు, రెస్క్యూ వాహనాలతో పాటు కనీసం ఆరు అగ్నిమాపక బృందాలను రంగంలోకి దించారు. ప్రస్తుతం శిథిలాలను తొలగిస్తూ లోపల ఎవరైనా చిక్కుకున్నారా అనే కోణంలో గాలింపు కొనసాగిస్తున్నారు. సీనియర్ అధికారులు సైతం ఘటనా స్థలంలోనే ఉండి సహాయక చర్యలను పర్యవేక్షిస్తున్నారు. అయితే భవనం కూలిపోవడానికి గల కారణాలు ఇంకా వెల్లడికాలేదు. ప్రమాద సమయంలో భవనంలో ఎంతమంది ఉన్నారు? ఎంతమంది శిథిలాల కింద చిక్కుకున్నారు? ఎవరైనా గాయపడ్డారా? అనే వివరాలపై స్పష్టత రావాల్సి ఉంది. సహాయక చర్యలు పూర్తయిన తర్వాతే ప్రమాద తీవ్రతపై పూర్తి వివరాలు వెల్లడయ్యే అవకాశం ఉంది.