హోర్ముజ్‌లో భారత్‌ నౌకలకు ప్రత్యేక అనుమతి.. ఇరాన్ కీలక నిర్ణయం

హోర్ముజ్ జలసంధి వద్ద అంతర్జాతీయ ఉద్రిక్తతలు కొనసాగుతున్న వేళ ఇరాన్ కీలక నిర్ణయం తీసుకుంది. భారత్‌కు చెందిన వాణిజ్య నౌకలు ఈ జలసంధి గుండా రాకపోకలు సాగించేందుకు ప్రత్యేక అనుమతి ఇచ్చింది. భారత్‌తో పాటు చైనా, ఇరాక్, ఖతార్ దేశాలకు చెందిన నౌకల ప్రయాణానికి కూడా ఎలాంటి ఆంక్షలు విధించడం లేదని ప్రకటించింది. ఈ విషయాన్ని ఇరాన్ పార్లమెంట్ జాతీయ భద్రత, విదేశీ విధాన కమిటీ వైస్ చైర్మన్ హయత్ మొఘద్దమ్ వెల్లడించారు. ఈ నాలుగు దేశాలకు చెందిన వాణిజ్య నౌకలు హోర్ముజ్ జలసంధి గుండా స్వేచ్ఛగా ప్రయాణించవచ్చని ఆయన స్పష్టం చేశారు. అమెరికా కూడా వాటి రాకపోకలను అడ్డుకోదని పేర్కొన్నారు. అయితే, భారత్‌కు ఈ అనుమతి వెనుక కీలక కారణాలు ఉన్నట్లు అంతర్జాతీయ వార్తా కథనాలు విశ్లేషిస్తున్నాయి. ముఖ్యంగా మందుల దిగుమతులకు ఆటంకాలు కలగకుండా ఉండేందుకు భారత్ నౌకలకు అనుమతి ఇచ్చినట్లు తెలుస్తోంది. చైనాకు రాజకీయంగా మద్దతుగా నిలుస్తున్న నేపథ్యంలో ఆ దేశ నౌకలకు కూడా వెసులుబాటు కల్పించినట్లు కథనాలు పేర్కొన్నాయి. మరోవైపు, ఈ అనుమతులకు సంబంధించి రవాణా రుసుముల విషయంలోనూ భిన్నమైన నిబంధనలు ఉన్నట్లు సమాచారం. భారత్, చైనా నౌకలు ప్రయాణ రుసుము చెల్లించాల్సి ఉంటుందని, ఖతార్ నౌకలకు మాత్రం ఎలాంటి రుసుము లేకుండా అనుమతి ఇచ్చినట్లు అంతర్జాతీయ కథనాలు వెల్లడించాయి. హోర్ముజ్ జలసంధి ప్రపంచ చమురు, వాణిజ్య రవాణాకు అత్యంత కీలకమైన మార్గం కావడంతో ఇరాన్ తీసుకున్న ఈ నిర్ణయం అంతర్జాతీయంగా ప్రాధాన్యం సంతరించుకుంది. ముఖ్యంగా భారత్ వంటి దిగుమతులపై ఆధారపడే దేశాలకు ఈ పరిణామం కీలకంగా మారింది.