తొమ్మిది పెళ్లిళ్ల ఆరోపణలు.. ఏడో భర్తపై కేసును కొట్టివేసిన హైకోర్టు

వరకట్న వేధింపులు, క్రూరత్వం ఆరోపణలు.. ప్రాథమిక ఆధారాలు లేవన్న న్యాయస్థానం బళ్లారి, నవంబరు 10: తొమ్మిది వివాహాలు చేసుకున్నారంటూ ఆరోపణలు ఎదుర్కొంటున్న ఓ మహిళ.. తన ఏడో భర్తపై పెట్టిన వేధింపుల కేసులో కర్ణాటక హైకోర్టు కీలక నిర్ణయం తీసుకుంది. వరకట్నం కోసం వేధిస్తున్నారని, క్రూరత్వానికి పాల్పడుతున్నారని ఆమె చేసిన ఆరోపణలకు ప్రాథమిక ఆధారాలు లేవని పేర్కొంటూ కేసును కొట్టివేసింది. ఉడుపి కోర్టులో పెండింగ్‌లో ఉన్న విచారణను రద్దు చేస్తూ జస్టిస్‌ నాగప్రసన్న ధర్మాసనం ఈ మేరకు ఉత్తర్వులు జారీ చేసింది. హోస్పేట్‌కు చెందిన ఓ రాజకీయ నాయకుడిపై అతని భార్య చేసిన ఫిర్యాదు మేరకు వరకట్న వేధింపులు, క్రూరత్వం కింద కేసు నమోదైంది. దర్యాప్తు అనంతరం పోలీసులు ఉడుపి కోర్టులో చార్జిషీట్‌ దాఖలు చేశారు. ఈ కేసును సవాల్‌ చేస్తూ బాధితుడిగా పేర్కొన్న రాజకీయ నాయకుడు కర్ణాటక హైకోర్టును ఆశ్రయించారు. తనపై ఫిర్యాదు చేసిన మహిళ ఇప్పటివరకు తొమ్మిదిసార్లు వివాహం చేసుకున్నారని పిటిషనర్‌ ఆరోపించారు. ప్రతి వివాహం అనంతరం వివాదాలు తలెత్తడం, కేసులు నమోదు చేయడం, ఆ తర్వాత రాజీకి రావడం ఆమెకు అలవాటుగా మారిందని కోర్టుకు వివరించారు. ఇందుకు సంబంధించిన ఆధారాలను కూడా సమర్పించినట్లు పిటిషన్‌లో పేర్కొన్నారు. అయితే ఈ ఆరోపణలను మహిళ ఖండించారు. తాను తొమ్మిదిసార్లు కాకుండా కేవలం నాలుగుసార్లు మాత్రమే వివాహం చేసుకున్నానని స్పష్టం చేశారు. ప్రతి వివాహం అనంతరం విడాకులు, తలాక్‌ లేదా ఖులా ద్వారా చట్టబద్ధంగా విడిపోయిన తర్వాతే మరో వివాహం చేసుకున్నట్లు కోర్టుకు వివరించారు. ఇరుపక్షాల వాదనలు పరిశీలించిన హైకోర్టు.. మహిళ చేసిన వరకట్న వేధింపులు, క్రూరత్వం ఆరోపణలకు ప్రాథమిక ఆధారాలు కనిపించడం లేదని అభిప్రాయపడింది. ఈ నేపథ్యంలో రాజకీయ నాయకుడిపై నమోదైన కేసును కొట్టివేస్తూ, ఉడుపి కోర్టులో కొనసాగుతున్న విచారణను రద్దు చేసింది. ఈ వ్యవహారంలో మహిళ వివాహాల సంఖ్యపై ఇరుపక్షాలు భిన్నమైన వాదనలు వినిపించినప్పటికీ, కేసు కొట్టివేతకు ప్రధాన కారణం వేధింపుల ఆరోపణలకు ప్రాథమిక ఆధారాలు లేకపోవడమేనని గమనించాలి. ఆరోపణలు, వాటికి సంబంధించిన ఆధారాల ఆధారంగానే న్యాయస్థానం నిర్ణయం తీసుకుంది.