నీట్ పీజీ ప్రవేశాల్లో కీలక మార్పులు.. 2027 నుంచి ర్యాంకుల ఆధారంగా సీట్ల కేటాయింపు!

నీట్ పీజీ, నీట్ సూపర్ స్పెషాలిటీ కోర్సుల ప్రవేశ విధానంలో కీలక మార్పులు చోటుచేసుకునే అవకాశం కనిపిస్తోంది. ప్రస్తుతం అమల్లో ఉన్న పర్సంటైల్ ఆధారిత అర్హత విధానానికి స్వస్తి పలికి, ర్యాంకుల ఆధారంగా మెరిట్ ప్రాతిపదికన సీట్లు కేటాయించే విధానాన్ని తీసుకురావాలని నిపుణుల కమిటీ ప్రతిపాదించింది. ఈ కొత్త విధానాన్ని 2027 నుంచి అమలు చేయాలని సిఫారసు చేసింది. ఇంటర్నెట్ డెస్క్: దేశవ్యాప్తంగా పీజీ వైద్య విద్య ప్రవేశాల ప్రక్రియలో మార్పులకు రంగం సిద్ధమవుతోంది. నీట్ పీజీ, నీట్ సూపర్ స్పెషాలిటీ కోర్సుల్లో ప్రవేశాల కోసం ప్రస్తుతం అనుసరిస్తున్న పర్సంటైల్ ఆధారిత అర్హత విధానంపై పలు అభ్యంతరాలు వ్యక్తమవుతున్న నేపథ్యంలో కేంద్రం ఏర్పాటు చేసిన 12 మంది సభ్యుల నిపుణుల కమిటీ కీలక సిఫారసులు చేసింది. అభ్యర్థుల పర్సంటైల్ కటాఫ్‌ను పరిగణనలోకి తీసుకోవడం కంటే, పరీక్షలో సాధించిన ర్యాంకుల ఆధారంగా మెరిట్ ప్రకారం సీట్లు కేటాయించాలని సూచించింది. ఈ మేరకు కమిటీ తన నివేదికను నవంబర్ 3న సుప్రీంకోర్టుకు సమర్పించింది. నేషనల్ మెడికల్ కమిషన్ (ఎన్‌ఎంసీ) కూడా ఈ ప్రతిపాదనకు సూత్రప్రాయంగా ఆమోదం తెలిపింది. అయితే, 2027 నుంచి కొత్త విధానాన్ని అమలు చేయాలనే ప్రతిపాదన ఉన్నప్పటికీ, దీనికి సంబంధించిన పూర్తి మార్గదర్శకాలు, విధివిధానాలు ఇంకా ఖరారు కావాల్సి ఉంది. మరోవైపు, పీజీ మెడికల్ సీట్లు ఖాళీగా మిగిలిపోతున్నాయనే కారణంతో కనీస అర్హత ప్రమాణాలను పదేపదే తగ్గించడం సరికాదని కమిటీ అభిప్రాయపడింది. ప్రవేశాల నాణ్యతను కాపాడేందుకు అర్హత ప్రమాణాల విషయంలో సమతుల్య విధానం అవసరమని స్పష్టం చేసింది. నాన్ క్లినికల్ పీజీ కోర్సుల ఫీజులను తగ్గించాలని, ప్రీ క్లినికల్, పారాక్లినికల్ విభాగాలను ఎంచుకునే అభ్యర్థులకు సర్వీస్ బాండ్ల నుంచి మినహాయింపు కల్పించాలని కూడా సిఫారసు చేసింది. కౌన్సెలింగ్ ప్రక్రియలో జాప్యాన్ని నివారించి, అందుబాటులో ఉన్న మెడికల్ సీట్లన్నీ సక్రమంగా భర్తీ అయ్యేలా చర్యలు తీసుకోవాలని సూచించింది. అసలు వివాదం ఎక్కడ మొదలైంది? నీట్ పీజీ కౌన్సెలింగ్ సమయంలో దేశవ్యాప్తంగా పెద్ద సంఖ్యలో మెడికల్ సీట్లు ఖాళీగా మిగిలిపోతుండటంతో అర్హత కటాఫ్ తగ్గింపు అంశం వివాదానికి దారితీసింది. 2023లో అన్ని కేటగిరీల అభ్యర్థులకు అర్హత పర్సంటైల్‌ను సున్నాకు తగ్గించడంతో, నెగెటివ్ మార్కులు వచ్చిన అభ్యర్థులకు సైతం కౌన్సెలింగ్‌లో పాల్గొనే అవకాశం లభించింది. 2024లో జనరల్, ఈడబ్ల్యూఎస్ అభ్యర్థులకు 15 పర్సంటైల్, రిజర్వ్డ్ కేటగిరీలకు 10 పర్సంటైల్‌గా కటాఫ్ నిర్ణయించారు. 2025-26 ప్రవేశాల సమయంలోనూ ఇదే తరహా పరిస్థితి కొనసాగింది. 2026 జనవరి 13న ఎన్‌బీఈఎంఎస్ మూడో విడత కౌన్సెలింగ్ కోసం మరోసారి అర్హత కటాఫ్‌ను భారీగా తగ్గించింది. జనరల్ కేటగిరీ అభ్యర్థులకు 50 నుంచి 7 పర్సంటైల్‌కు, జనరల్ పీడబ్ల్యూడీ అభ్యర్థులకు 45 నుంచి 5 పర్సంటైల్‌కు తగ్గించింది. ఎస్సీ, ఎస్టీ, ఓబీసీ అభ్యర్థులకు 40 పర్సంటైల్ నుంచి సున్నాకు కుదించింది. ఈ నిర్ణయంతో నెగెటివ్ మార్కులు వచ్చిన అభ్యర్థులు కూడా కౌన్సెలింగ్‌కు అర్హత సాధించారు. కటాఫ్ తగ్గింపు కారణంగా అదనంగా 95,913 మంది అభ్యర్థులకు కౌన్సెలింగ్‌లో పాల్గొనే అవకాశం లభించినట్లు సుప్రీంకోర్టుకు సమర్పించిన గణాంకాలు వెల్లడించాయి. అయితే, అర్హత ప్రమాణాలను ఇంత భారీగా తగ్గించడం వల్ల వైద్య విద్యా ప్రమాణాలు, భవిష్యత్తులో వైద్య సేవల నాణ్యతపై ప్రభావం పడుతుందనే ఆందోళనలు వ్యక్తమయ్యాయి. ఈ నేపథ్యంలోనే సుప్రీంకోర్టు నిపుణుల కమిటీని ఏర్పాటు చేసి, మొత్తం ప్రవేశ విధానాన్ని సమీక్షించే బాధ్యత అప్పగించింది. ప్రస్తుతం కమిటీ నివేదికపై పిటిషనర్లు తమ అభిప్రాయాలను తెలియజేయాల్సి ఉంది. అనంతరం సుప్రీంకోర్టు తదుపరి విచారణ చేపట్టనుంది. న్యాయస్థానం పరిశీలన, తుది నిర్ణయం, అధికారిక మార్గదర్శకాల ఆధారంగానే కొత్త ప్రవేశ విధానం అమలుపై స్పష్టత రానుంది.