సోనియా గాంధీ ఆత్మకథలో మూడు తప్పులు.. చారిత్రక తేదీలపై విమర్శలు!

కాంగ్రెస్ అగ్రనేత సోనియా గాంధీ రచించిన ఆత్మకథ ‘బిలాంగింగ్‌: ఏ జర్నీ ఆఫ్‌ లవ్‌’ విడుదలైన వెంటనే రాజకీయంగా చర్చనీయాంశంగా మారింది. పుస్తకంలోని రాజకీయ అంశాలపై చర్చ జరుగుతుండగానే.. చారిత్రక సంఘటనలకు సంబంధించిన మూడు తేదీల్లో పొరపాట్లు ఉన్నాయంటూ విమర్శలు వ్యక్తమవుతున్నాయి. అన్నా హజారే అవినీతి వ్యతిరేక ఉద్యమం, ఆర్‌ఎస్‌ఎస్ ఆవిర్భావం, కాంగ్రెస్ సీనియర్ నేత అహ్మద్ పటేల్ మరణ తేదీ విషయంలో తప్పులు దొర్లినట్లు గుర్తించారు. అన్నా హజారే ఉద్యమం.. ఏడాది తేడా సోనియా గాంధీ తన ఆత్మకథలోని 33వ అధ్యాయం, 461వ పేజీలో అన్నా హజారే దేశవ్యాప్తంగా అవినీతి వ్యతిరేక ఉద్యమాన్ని 2012లో చేపట్టినట్లు పేర్కొన్నారు. అయితే వాస్తవానికి ఈ ఉద్యమం 2011 ఏప్రిల్‌లోనే దేశవ్యాప్తంగా ఊపందుకుంది. బలమైన అవినీతి నిరోధక చట్టం కోసం అన్నా హజారే నిరాహార దీక్ష చేపట్టడం అప్పట్లో దేశ రాజకీయాల్లో తీవ్ర చర్చకు దారితీసింది. అరవింద్ కేజ్రీవాల్, కిరణ్ బేడీ తదితరులు కూడా ఈ ఉద్యమంలో కీలకంగా పాల్గొన్నారు. ఆర్‌ఎస్‌ఎస్ ఆవిర్భావంపై మరో పొరపాటు ఆత్మకథలోని 24వ అధ్యాయం, 338వ పేజీలో రాష్ట్రీయ స్వయంసేవక్ సంఘ్ (ఆర్‌ఎస్‌ఎస్) 1921లో ఏర్పాటైనట్లు పేర్కొన్నారు. కానీ చారిత్రకంగా ఆర్‌ఎస్‌ఎస్ స్థాపన 1925 సెప్టెంబరు 27న జరిగింది. ఈ విషయంలోనూ పుస్తకంలో నాలుగేళ్ల తేడాతో తప్పు నమోదైంది. అహ్మద్ పటేల్ మరణ తేదీలోనూ తప్పిదం కాంగ్రెస్ సీనియర్ నాయకుడు, సోనియా గాంధీకి అత్యంత సన్నిహితుడిగా గుర్తింపు పొందిన అహ్మద్ పటేల్ మరణించిన సంవత్సరం విషయంలోనూ పొరపాటు కనిపించింది. పుస్తకంలోని 29వ అధ్యాయం, 401వ పేజీలో ఆయన 2022లో మరణించినట్లు పేర్కొన్నారు. అయితే అహ్మద్ పటేల్ వాస్తవానికి 2020 నవంబరు 25న కన్నుమూశారు. మూడు కీలక చారిత్రక అంశాల్లో తేదీల పొరపాట్లు వెలుగులోకి రావడంతో సోనియా గాంధీ ఆత్మకథపై చర్చ మొదలైంది. రాజకీయంగా ప్రాధాన్యం ఉన్న సంఘటనలు, నేతలకు సంబంధించిన వివరాల్లో ఇలాంటి తప్పులు ఎలా దొర్లాయన్న ప్రశ్నలు వ్యక్తమవుతున్నాయి.