దీపావళి, హోలీకి ఉచిత గ్యాస్ సిలిండర్లు.. యోగి సర్కార్ కీలక ప్రకటన

ఉత్తరప్రదేశ్‌లో వచ్చే ఏడాది అసెంబ్లీ ఎన్నికలు జరగనున్న నేపథ్యంలో ముఖ్యమంత్రి యోగి ఆదిత్యనాథ్ కీలక ప్రకటన చేశారు. ప్రధానమంత్రి ఉజ్వల యోజన కింద అర్హులైన పేద కుటుంబాలకు దీపావళి, హోలీ పండుగల సందర్భంగా ఒక్కో ఉచిత ఎల్పీజీ సిలిండర్ అందించనున్నట్లు ప్రకటించారు. పండుగల సమయంలో సామాన్య కుటుంబాలపై పడే ఆర్థిక భారాన్ని తగ్గించడమే లక్ష్యంగా ఈ నిర్ణయం తీసుకున్నట్లు వెల్లడించారు. మంగళవారం రాష్ట్రంలో 1.89 కోట్ల మందికి పైగా లబ్ధిదారులకు గ్యాస్ సిలిండర్ రీఫిల్ సబ్సిడీ పంపిణీ కార్యక్రమంలో యోగి పాల్గొన్నారు. ఈ సందర్భంగా మాట్లాడుతూ.. ఉజ్వల యోజన లబ్ధిదారులకు సిలిండర్ రీఫిల్ సబ్సిడీ అందించేందుకు రాష్ట్ర ప్రభుత్వం రూ.1,500 కోట్లు కేటాయించినట్లు తెలిపారు. ప్రస్తుతం గృహ వినియోగ ఎల్పీజీ సిలిండర్ ధర రూ.983.45గా ఉందని, ఇందులో కేంద్ర ప్రభుత్వం రూ.335 సబ్సిడీ అందిస్తోందని వివరించారు. మిగిలిన రూ.648.55ను వినియోగదారులు చెల్లించాల్సి ఉంటుందని పేర్కొన్నారు. దీపావళి, హోలీ సందర్భంగా ఉచిత సిలిండర్ అందించడం ద్వారా పేద కుటుంబాలకు కొంత ఆర్థిక వెసులుబాటు కలుగుతుందని అన్నారు. ఆ మొత్తాన్ని పండుగ అవసరాలకు, స్వీట్లు, దీపాల కొనుగోలుకు వినియోగించుకోవచ్చని వ్యాఖ్యానించారు. ఈ సందర్భంగా కాంగ్రెస్ పార్టీపై కూడా యోగి విమర్శలు చేశారు. గతంలో కాంగ్రెస్ ప్రభుత్వ హయాంలో గ్యాస్ కనెక్షన్ పొందేందుకు ప్రజలు అనేక ఇబ్బందులు ఎదుర్కొనేవారని, తమ ప్రభుత్వం పేద కుటుంబాలకు ఉచితంగా గ్యాస్ కనెక్షన్లు అందించిందని పేర్కొన్నారు. మరోవైపు, ఈనెల 7న అయోధ్యలో నిర్వహించనున్న దీపోత్సవ్ కార్యక్రమం సామాజిక ఐక్యతకు ప్రతీకగా నిలుస్తుందని యోగి అన్నారు. దీపోత్సవ్ ఏర్పాట్లను స్వయంగా పరిశీలించేందుకు అయోధ్యను సందర్శించనున్నట్లు తెలిపారు. వచ్చే ఏడాది అసెంబ్లీ ఎన్నికలు జరగనున్న నేపథ్యంలో పండుగల సందర్భంగా ఉచిత గ్యాస్ సిలిండర్ల ప్రకటన రాజకీయంగా కూడా ప్రాధాన్యం సంతరించుకుంది. సంక్షేమ పథకాల ద్వారా పేద కుటుంబాలకు చేరువ కావడంపై యోగి ప్రభుత్వం దృష్టి సారిస్తున్నట్లు ఈ ప్రకటన స్పష్టం చేస్తోంది.